இலங்கையின் போர்க்குற்றத்தை ஐ.நா. முழுமையாக விசாரிக்க வேண்டும்-வரவர ராவ் கோரிக்கை

நெல்லூர்: இலங்கையில் நடந்த உள்நாட்டுப் போரின் முடிவின்போது இலங்கை ராணுவத்தினர் செய்த மிக மோசமான மனித உரிமை மீறல்கள், போர்க்குற்றங்கள் குறித்து சர்வதேச சமுதாயமும், ஐ.நா.வும் பாரபட்சமற்ற விரிவான விசாரணையை நடத்த வேண்டும். குற்றம் இழைத்தவர்கள் தண்டிக்கப்பட வேண்டும் என்று புரட்சிகர எழுத்தாளரும், நக்ஸல் இயக்க ஆதரவாளருமான வரவர ராவ் கோரிக்கை விடுத்துள்ளார்.

ஈழத் தமிழர்கள் சிந்திய ரத்தக் கண்ணீருக்கு பதில் கிடைக்க வேண்டும் என்ற கோரிக்கை தற்போது தமிழ் உலகையும் தாண்டி பிற மொழியினரிடமிருந்தும் எழத் தொடங்கியுள்ளது. இங்கிலாந்தில், இலங்கைக்கு எதிராக மிகப் பெரிய அளவிலான குமுறல் வெடித்துக் கிளம்பியுள்ளது. சர்வதேச மனித உரிமை ஆணையமும் இலங்கைக்கு எதிராக தீவிரமாக செயல்பட்டு வருகிறது.

இந்த நிலையில் நக்சல் இயக்க ஆதரவாளரும், புரட்சிகர எழுத்தாளருமான ஆந்திராவைச் சேர்ந்த வரவர ராவ் இலங்கையின் போர்க்குற்றத்தைக் கடுமையாக கண்டித்துள்ளார்.

நெல்லூரில் நடந்த புரட்சிகர எழுத்தாளர் சங்கத்தின் மாவட்ட மாநாட்டில் கலந்து கொள்வதற்காக வரவர ராவ் வந்திருந்தார். அப்போது செய்தியாளர்களிடம் அவர் பேசுகையில், ஐநா.வும், சர்வதேச சமுதாயமும் இணைந்து இலங்கையில் நடந்த போர்க்குற்றங்கள் தொடர்பாக பாரபட்சமற்ற, சுதந்திரமான விசாரணையை நடத்த வேண்டும்.

இலங்கை அரசின் உத்தரவின் பேரில், அதன் திட்டத்தின் பேரில்தான் இலங்கை ராணுவம் அப்பாவி மக்களுக்கு எதிராக பல்வேறு அக்கிரமக் கொடுமைகளில் ஈடுபட்டது. இதை ஐ.நா. விசாரணை மூலம்தான் உலகுக்கு அம்பலப்படுத்த முடியும்.

மீடியாக்களையும், சர்வதேச மனித உரிமை அமைப்புகளையும் போர் பாதித்த பகுதிகளுக்கு இலங்கை அரசு அனுமதிக்க வேண்டும். இதற்கான நடவடிக்கையை ஐ.நா. சபையும், சர்வதேச சமுதாயமும் எடுக்க வேண்டும்.

தமிழர்கள் அதிகம் வசிக்கும் பகுதிகளில் நடந்த ராணுவ அடக்குமுறைகள், போர்க்குற்ற மனித உரிமை மீறல்கள் முழுமையாக அம்பலத்திற்குக் கொண்டு வரப்பட வேண்டும்.

2004ம் ஆண்டு மத்தியில் பதவிக்கு வந்த ஐக்கிய முற்போக்குக் கூட்டணி அரசு, அன்று முதல் போர் முடிந்த காலகட்டம் வரை இலங்கைக்கு செய்த ராணுவ உதவிகள் உள்ளிட்ட பிற உதவிகள் குறித்து வெள்ளை அறிக்கை வெளியிட வேண்டும்.

இலங்கை குறித்த இந்தியாவின் வெளியுறவுக் கொள்கை என்ன என்பதையும் இந்திய அரசு வெளிப்படையாக அறிவித்தாக வேண்டும்.

சட்டிஸ்கரில் இன்று ராணுவத்தைக் குவித்து வைத்துள்ளனர். இதனால் பாதிக்கப்பட்டிருப்போர் அப்பாவி மக்கள்தான். எனவே ராணுவத்தை உடனடியாக அங்கிருந்து வாபஸ் பெற வேண்டும். மேலும் ஜார்க்கண்ட்டில் ராஞ்சி உயர்நீதிமன்றத்தால் ஐந்து ஆதிவாசிகளுக்கு விதிக்கப்பட்ட மரண தண்டனையை குறைக்க வேண்டும் என்றார் ராவ்.
http://thatstamil.oneindia.in/news/2011/07/05/varavara-rao-probe-into-war-crimes-lanka-aid0091.html

தலைப்பாகையுடன் வந்த இந்தியருக்கு ஆஸி.,ஓட்டலில் அனுமதி மறுப்பு

மெல்போர்ன் : ஆஸ்திரேலிய ஓட்டலில், தலைப்பாகை கழற்ற மறுத்த இந்தியரை, ஓட்டலுக்குள் அனுமதிக்க மறுத்த விஷயம் சர்ச்சையை கிளப்பியுள்ளது. இந்தியரிடம் மன்னிப்பு கேட்க ஓட்டல் நிர்வாகமும் முயற்சித்து வருகிறது. ஆஸ்திரேலியாவில் பிரிஸ்பேன் நகரில் உள்ளது, ராயல் இங்கிலீஷ் ஓட்டல். இந்த ஓட்டலுக்கு சீக்கிய மதத்தைச் சேர்ந்த, ஆஸ்திரேலியா வாழ் இந்தியர் ஒருவர், தலைப்பாகை அணிந்து சென்றார். ஓட்டலின் வாசலில் காவலுக்கு நின்றவர், இவரை தடுத்து, தலைப்பாகையை கழற்ற வலியுறுத்தினார். இதற்கு இந்தியர் மறுக்கவே, ஓட்டலுக்குள் செல்ல அனுமதிக்கவில்லை. இச்சம்பவம் ஆஸ்திரேலியா வாழ் இந்தியர்கள் இடையே, பலத்த சர்ச்சையை கிளப்பியுள்ளது.
இதுகுறித்து, அந்த ஓட்டலின் செய்தி தொடர்பாளர் கூறுகையில், "பாதுகாப்புப் பணிக்கு வசதியாக தலைப்பாகையை கழற்ற வேண்டும் என்பது ஓட்டலின் கொள்கை. இந்த குறிப்பிட்ட சம்பவத்தில், தலைப்பாகை அணிந்து வந்தவரை கழற்றும்படி வலியுறுத்தி இருக்கக் கூடாது. மன்னிப்பு கேட்பதற்காக, பாதிக்கப்பட்வரை தேடி வருகிறோம். ஓட்டலின் கொள்கையை சரியான முறையில் கையாள்வது பற்றி, காவலர்களுக்கு மீண்டும் அறிவுறுத்தி வருகிறோம்' என்றார்.
ஆஸ்திரேலியாவின் ஏ.பி.சி., ரேடியோவை தொடர்பு கொண்டு, ஒருவர், இப்புகாரை தெரிவித்த பின்னர் இச்சம்பவம் பலத்த சர்ச்சையை கிளப்பியுள்ளது. இதுகுறித்து, இந்திய வம்சாவளி மக்களுக்கான, உலக அமைப்புத் தலைவர் உமேஷ் சந்திரன் பிரிஸ்பேனில் கூறுகையில், "சீக்கிய மதத்தினர் தலைப்பாகை அணிவது என்பது மரியாதைக்குரியது. இதுபோன்ற சம்பவம் இதுவரை நடந்தது இல்லை. போலீஸ் துறையில் தலைப்பாகைக்கு சிறப்பான மரியாதை அளிக்கப்படுகிறது. போலீஸ் பணியிலிருக்கும் இந்தியர் கூட தலைப்பாகை அணிய அனுமதிக்கப்படுகிறது' என்றார்.
http://www.dinamalar.com/

கழுத்து அழுத்தப்பட்டதால் பாட்சா மரணம்: டாக்டர் வாக்குமூலம்-தற்கொலை கடிதம் போலி?

சென்னை: முன்னாள் மத்திய தொலைத் தொடர்புத்துறை அமைச்சர் ராசாவின் நண்பரான சாதிக் பாட்சா கழுத்து அழுத்தப்பட்டதால் தான் இறந்தார் என்று அவரது உடலை பிரேதப் பரிசோதனை செய்த டாக்டர் டிகால் சிபிஐ அதிகாரிகளிடம் வாக்குமூலம் அளித்துள்ளார்.

சாதிக் பாட்சா மரணம் குறித்து சிபிஐ விசாரித்து வருகிறது. முன்பு ற்கொலை என்று கூறப்பட்ட இந்த வழக்கை சிபிஐ விசாரிக்க ஆரம்பித்ததையடுத்து, அதில் பல்வேறு முடிச்சுகள் அவிழ ஆரம்பித்துள்ளன. இது கொலையாக இருக்கலாம் என்று கருதப்படுகிறது.

சாதிக் பாட்சாவின் மனைவி மற்றும் உறவினர்கள் சொன்ன தகவல் அடிப்படையில் அவர் தற்கொலை செய்திருக்கலாம் என்று முதலில் கருதப்பட்டது. ஆனால் சி.பி.ஐ. அதிகாரிகள் நடத்திய விசாரணை அடிப்படையில், அவர் கொலை செய்யப்பட்டதற்கான வாய்ப்புகளே அதிகம் இருப்பதாகத் தெரியவந்தது.

இந் நிலையில் தனியார் மருத்துவக் கல்லூரியில் தடய அறிவியல் துறை உதவிப் பேராசிரியராக உள்ள டாக்டர் டிகாலை சிபிஐ அதிகாரிகள் சென்னை சாஸ்திரி பவனில் உள்ள சிபிஐ அலுவலகத்துக்கு அழைத்து 1 மணி நேரம் விசாரணை நடத்தினர்.

அப்போது அவர் கூறுகையில், சாதிக் பாட்சா உடலை பிரேத பரிசோதனை செய்த பிறகு அவரது மரணம் தற்கொலை என்று நான் கூறவே இல்லை. மாறாக கழுத்து அழுத்தப்பட்டே சாதிக் பாட்சா இறந்ததாக பிரேத பரிசோதனை அறிக்கையில் கூறியிருந்தேன் என்றார்.

இந்த விசாரணையின்போது டெல்லி அகில இந்திய மருத்துவக் கழகத்தின் (எய்ம்ஸ்) தடய அறிவியல் துறை முன்னாள் தலைவர் டாக்டர் டோக்ராவும் உடனிருந்தார்.

சாதிக் பாட்சா பிரேத பரிசோதனை அறிக்கை, பிரதேப் பரிசோதனையின் வீடியோ பதிவு ஆகிய அனைத்தையும் சிபிஐ அதிகாரிகள் முழுமையாக ஆய்வு செய்து டாக்டர் டிகாலிடம் விசாரணை நடத்தினர்.

மேலும், சிறப்பு மருத்துவக் குழுவினர் மூலம் சாதிக் பாட்சா உடலை முழுமையாக பிரேத பரிசோதனை செய்யாமல் விட்டது ஏன் என்றும் சிபிஐ அதிகாரிகள் கேள்வி எழுப்பியதாகத் தெரிகிறது.

2ஜி ஸ்பெக்ட்ரம் விவகாரத்தில் சிபிஐயால் விசாரிக்கப்பட்டு வந்த நிலையில் சாதிக் பாட்சா மர்மமாக இறந்தது நினைவுகூறத்தக்கது.

சாதிக் பாட்சா சாவதற்கு முன் எழுதிய கடிதம் போலியானதா?:

இந் நிலையில் சாதிக் பாட்சா சாவதற்கு முன் எழுதியதாக வெளியிடப்பட்ட கடிதம் போலியானதாக இருக்கலாம் என்று சி.பி.ஐ. கருதுகிறது.

அந்த கடிதத்தை டெல்லியில் இருந்து வந்த நிபுணர்கள் ஆய்வு செய்து வருகின்றனர்.

சாதிக் பாட்சா இறந்தபோது அவர் எழுதி வைத்ததாக ஒரு கடிதத்தை, முதலில் விசாரித்த தேனாம்பேட்டை போலீசார் கைப்பற்றினார்கள். அதில், சிபிஐ விசாரணையால் மன உளைச்சல் ஏற்பட்டதால் தற்கொலை செய்வதாக எழுதப்பட்டிருந்தது.

ஆனால், அந்தக் கடிதமே போலியானதாக இருக்கலாம் என்று சி.பி.ஐ. கருதுகிறது. எனவே அந்தத் கடிதத்தை, எய்ம்ஸ் தடய அறிவியல் துறை முன்னாள் தலைவர் டாக்டர் டோக்ராவிடம் சிபிஐ வழங்கியுள்ளது.

அதை அவரது தலைமையிலான நிபுணர்கள் ஆய்வு செய்து வருகின்றனர். இவர்கள் வழங்கும் ஆய்வறிக்கை சாதிக் பாட்சா மரணத்தில் பெரும் திருப்பத்தை ஏற்படுத்தலாம் என்று கருதப்படுகிறது

சன் டி.வி. நிர்வாகி கைது: கிளறப்படும் பழைய புகார்கள்- போலீஸ் விசாரணைக்கு அனுமதி கேட்டு நீதிமன்றத்தில் மனு

சென்னை, ஜூலை 4: திரைப்பட விநியோகஸ்தரை மிரட்டியதாக கூறப்படும் வழக்கில் சன் டி.வி. நிர்வாகி சக்சேனா கைது செய்யப்பட்டதால், அவர் தொடர்பான பழைய புகார்களை சென்னை மாநகரக் காவல்துறையினர் துப்புதுலக்கி வருகின்றனர்.
சேலத்தைச் சேர்ந்த திரைப்பட விநியோகஸ்தர் டி.எஸ்.செல்வராஜ். இவரிடம் சன் டி.வி.யின் தலைமை செயல் அதிகாரி ஹன்ஸ்ராஜ் சக்சேனா, "தீராத விளையாட்டு பிள்ளை' என்ற திரைப்படத்தின் சேலம் பகுதி விநியோக உரிமையை தருவதாக ரூ.1.25 கோடிக்கு ஒப்பந்தம் செய்தாராம்.
இந்நிலையில் சக்சேனா ஒப்பந்தப்படி அந்த படத்தின் சேலம் பகுதி விநியோக உரிமத்தை செல்வராஜுக்கு கொடுக்காமல், நேரடியாக விநியோகம் செய்தாராம். இதனால், தான் கொடுத்திருந்த ரூ. 82.53 லட்சத்தை செல்வராஜ் திருப்பிக் கேட்டதாகக் கூறப்படுகிறது. ஆனால் பணத்தை திருப்பிக் கொடுக்காமல் சக்சேனா இழுத்தடிப்பு செய்ததாக தெரிகிறது. மேலும் இப் பிரச்னையில் 5-1-2011 அன்று சக்சேனா, செல்வராஜுக்கு கொலை மிரட்டல் விடுத்தாராம்.
இது குறித்து கே.கே.நகர் காவல் நிலையத்தில் செல்வராஜ் புகார் செய்தார். புகாரின்பேரில் போலீஸôர் நம்பிக்கை மோசடி, வஞ்சித்து ஏமாற்றுதல், கொலை மிரட்டல் ஆகிய பிரிவுகளின் கீழ் சக்சேனா மீது வழக்குப் பதிந்தனர். இதையடுத்து ஞாயிற்றுக்கிழமை சக்சேனாவை கைது செய்தனர். பின்னர் கே.கே. நகர் காவல் நிலையத்தில் சக்சேனாவிடம் போலீஸôர் விசாரணை செய்தபின் சைதாப்பேட்டை நீதிமன்றத்தில் சக்சேனா ஆஜர்படுத்தப்பட்டார். நீதிமன்றம் அவரை 15 நாள்கள் சிறையில் அடைக்க உத்தரவிட்டது.
பழைய புகார்கள்: சென்னை மாநகர காவல்துறையில் சக்சேனா மீது 2 புகார்கள் இருப்பதாக கூறப்படுகிறது. இதில் ஒரு பெண்ணை மிரட்டியதாக ஏற்கனவே ஒரு புகார் மாநகர காவல்துறையில் உள்ளதாம். இப் புகார் வந்து பல மாதங்களாகிவிட்ட நிலையில், மாநகர காவல்துறை அப் புகார் மீது இப்போது துப்புதுலக்கி வருவதாகக் கூறப்படுகிறது. அதே போல அண்மையில் வெளியான ஒரு திரைப்படத்தின் டி.வி. உரிமத்தை வாங்கியதற்காக ரூ. 2.75 கோடி பணத்தை வழங்காமல் சக்சேனா இழுத்தடிப்பு செய்து வருவதாக அப் படத்தின் தயாரிப்பாளர் மாநகர காவல் ஆணையர் ஜே.கே.திரிபாதியிடம் கடந்த மாதம் 7-ம் தேதி புகார் அளித்தார். இப் புகார் குறித்தும் போலீஸôர் விசாரணையை முடுக்கிவிட்டுள்ளதாக தெரியவந்துள்ளது.இப் புகார்களின் கீழும் சக்சேனா மீது நடவடிக்கை எடுக்க வாய்ப்பு இருப்பதாகக் காவல்துறை வட்டாரங்கள் கூறுகின்றன. இந்தப் புகார்கள் குறித்து இன்னும் வழக்கு ஏதும் பதிவு செய்யப்படவில்லை என தகவல்கள் தெரிவிக்கின்றன.
காவல்துறை மனு: இதற்கிடையே கே.கே. நகர் போலீஸôர், சக்சேனாவை தங்களது காவலில் எடுத்து விசாரணை செய்வதற்கு அனுமதி கேட்டு சைதாப்பேட்டை நீதிமன்றத்தில் நேற்று திங்கள்கிழமை மனு தாக்கல் செய்தனர். இந்த மனு இன்று செவ்வாய்க்கிழமை விசாரணைக்கு வருகிறது
http://www.dinamani.com

கண்களால் கணனி செய்!

பிரிக்க முடியாதது எதுவோ? என்று கேட்டால் கம்ப்யூட்டரும் மவுசும் என்று ஆங்கிலத்திலும் ஓடினேட்டரும் சுறியும் என்று பிரெஞ்சிலும் என்று பதில் சொன்னீர்கள் என்றால்இ அது இனிமேல் தவறு. இப்போது மவுஸில்லாத அல்லது சுறி கம்ப்யூட்டர்கள் லேப் டாப்கள் வந்துவிட்டன.
டோப்லி என்ற சுவிட்ஸர்லாந்து கம்பெனி மவுஸில்லாத லேப் டாப்களைத் தயாரித்திருக்கிறது.
இந்த லேப் டாப் முன்பு அமர்ந்து அதை இயக்குபவர்களின் கண்ணசைவிலிருந்து லேப் டாப் இயங்குகிறது. மவுஸýக்குப் பதிலாகக் கண்கள்.
கண்களின் அசைவை உணரும் புற ஊதாக் கதிர்கள் மூலமாக இந்த லேப் டாப் இயங்குகிறது.
லேப் டாப்பில் உள்ள ஒரு ஃபைலை நீங்கள் சிறிது உற்றுப் பார்த்தால் அந்த ஃபைல் தானாகவே ஓப்பன் ஆகும். பிறகு உங்கள் கண்கள் பார்ப்பதற்கேற்ப கர்ஸர் மூவ் ஆகும். நீங்கள் ஒரு ஃபைலில் நான்கு வரிகள் பார்த்துவிட்ட பக்கத்து சீட் இளம்பெண்ணுடன் வழிந்து கொண்டிருந்தால் நீங்கள் எந்த வரியைப் பார்த்தீர்களோ அந்த வரியிலேயே கர்ஸர் லாக் ஆகி நிற்கும். அதுமட்டுமல்ல அந்த நேரத்தில் லேப்டாப் சற்று 'டிம்' ஆகி மின்சாரத்தைச் சேமிக்கும். உடற்குறைபாடு உள்ளவர்கள் பக்கவாதத்தால் பாதிக்கப்பட்டவர்கள் கணினியைப் பயன்படுத்த முடியாமல் தவித்த போது மவுசுக்குப் பதிலாக கண்ணசைவைப் பயன்படுத்தலாம் என்ற ஐடியா தோன்றியது.
இந்தக் கண் கட்டுப்பாட்டு முறையைப் பயன்படுத்தி இப்போது இன்னொரு பயனுள்ள கண்டுபிடிப்பும் கூட வந்திருக்கிறது.
இரவு நேரங்களில் காரை ஓட்டுபவர்கள் கொட்டாவி விட்டுக் கொண்டு சற்றுக் கண்களை மூடினால் அவர்களை எச்சரித்து எழுப்பிவிடக் கூடிய ஓலியை எழுப்பும் கருவிகளை இப்போது உருவாக்கியிருக்கிறார்கள்!

http://www.dinamani.com/

இலங்கை கடற்படையில் சீன வீரர்கள்? : உஷாரான உளவு பிரிவுகள் விசாரணை

ராமநாதபுரம் : தமிழக மீனவர்களை பிடித்து செல்லும் இலங்கை கடற்படையினருடன் சீன வீரர்களும் உள்ளதாக தகவல் வெளியானதை அடுத்து, இந்திய உளவு பிரிவினர் விசாரித்து வருகின்றனர். இலங்கை கடற்படை அவ்வப்போது தமிழக மீனவர்களை பிடித்து செல்வது வாடிக்கையாகி விட்டது. கடந்த மாதம் 23 மீனவர்களை பிடித்து செல்லப்பட்டனர். தமிழக அரசு கோரிக்கைபடி, மத்திய அரசு தலையிட்டதால் விடுவிக்கப்பட்டனர். நேற்றும் 14 மீனவர்கள் சிறைபிடிக்கப்பட்டனர். தமிழக மீனவர்களை பிடிக்க வரும் இலங்கை கடற்படை கப்பலில் சீன வீரர்களும் உள்ளதாக தகவல் வெளியாகி உள்ளது. இதுபற்றி தமிழக கியூ பிரிவு, டிடாச்மென்ட், மெரைன் போலீசார் மற்றும் மத்திய அரசின் "இன்டலிஜென்ஸ் பீரோ' ஆகிய உளவு பிரிவினர் சமீபத்தில் விடுவிக்கப்பட்ட தமிழக மீனவர்களிடம் விசாரித்து வருகின்றனர். கடந்தாண்டு கச்சத்தீவில் சீன வீரர்கள் முகாமிட்டிருந்ததை அங்கு திருவிழாவிற்கு சென்ற தமிழக மீனவர்கள் பார்த்துள்ளனர். இந்நிலையில் இலங்கை கடற்படை கப்பலில் வரும் சீன வீரர்கள் தமிழக எல்லை பகுதிகள் மற்றும் பாதுகாப்பு குறித்து கண்காணித்து வருகின்றனரா என்ற சந்தேகம் எழுந்துள்ளது.
http://www.dinamalar.com/News_Detail.asp?Id=269363

இந்தியாவிற்கு எதிராக இலங்கை செயற்படக் கூடிய அபாயம்: ஜெ. எச்சரிக்கை

இலங்கை, இந்தியாவிற்கு எதிராக செயற்படக் கூடிய அபாயம் நிலவி வருவதாக தமிழக முதல்வர் ஜெயலலிதா எச்சரித்துள்ளார்.

இது தொடர்பாக அவர் ஆங்கில தொலைக்காட்சி ஒன்றுக்கும் அளித்துள்ள பேட்டியில் கூறியிருப்பதாவது:

இலங்கை அரசாங்கம், சீனா மற்றும் பாகிஸ்தானுடன் இணைந்து இந்தியாவிற்கு எதிராக செயற்படக் கூடிய ஆபத்து காணப்படுகிறது.

பாகிஸ்தானைப் போன்றே சீனாவும் பல வழிகளில் இந்தியாவிற்கு அச்சுறுத்தலாக திகழ்கின்றது.

நேபாளம் மற்றும் இலங்கையுடன் மேற்கூறிய இரண்டு நாடுகளும் இணைந்து கொண்டு இந்தியாவிற்கு எதிராக நடவடிக்கை எடுக்கக் கூடும்.

இலங்கைக்கு எதிராக அழுத்தங்களை பிரயோகிக்குமாறு மத்திய அரசாங்கத்தை தொடர்ச்சியாக நான் வலியுறுத்தப்போகிறேன்.

பொருளாதாரத் தடை விதித்தல் மற்றும் கச்சதீவை மீட்பது ஆகிய தீர்மானங்கள் ஏற்கனவே இலங்கைக்கு எதிராக தமிழக சட்டமன்றத்தில் நிறைவேற்றப்பட்டுள்ளது என்று அந்த பேட்டியில் ஜெயலலிதா கூறியுள்ளார்.
http://tamil.webdunia.com/newsworld/news/national/1107/04/1110704041_1.htm

தமிழர்களின் படுகொலைக்குக் காரணமான இலங்கக்கோன் சிறிலங்காவின் புதிய காவல்துறை மா அதிபராகிறார்

ஏராளமான தமிழ் இளைஞர்களைப் படுகொலை செய்த சிறிலங்கா சிறப்பு அதிரடிப்படைப் பிரிவை வடக்கு கிழக்கில் வழிநடத்திய நிகால் இலங்கக்கோன் சிறிலங்காவின் புதிய காவல்துறை மா அதிபராக பதவியேற்கவுள்ளார்.

சிறிலங்காவின் 33வது காவல்துறை மா அதிபராக இன்று பதவியேற்கவுள்ள இலங்கக்கோன் 1982ம் ஆண்டு சிறிலங்கா காவல்துறையில் ஒரு உதவி அத்தியட்சகராக சேர்ந்து கொண்டிருந்தார்.

தமிழ் மக்களின் விடுதலை கோரிய ஆயுதப் போராட்டத்தை முறியடிக்க சிறிலங்காவின் முன்னாள் அதிபர் ஜே.ஆர்.ஜெயவர்த்தன 1983ம் ஆண்டு சிறப்பு அதிரடிப்படையை உருவாக்கியிருந்தார்.

சிறப்பு அதிரடிப்படையில் முதலாவதாக சேர்த்துக் கொள்ளப்பட்ட அணியில் இலங்கக்கோனும் இடம்பெற்றிருந்தார்.

இவர் 1983ம் ஆண்டுக்குப் பின்னர் யாழ்ப்பாணம், அம்பாறை ,மட்டக்களப்பு பகுதிகளில் சிறப்பு அதிரடிப்படையின் பிராந்தியத் தளபதி மற்றும் இணைப்பதிகாரியாகவும் பணியாற்றியுள்ளார்.

சிறப்பு அதிரடிப்படையின் முதலாவது பிரதித் தளபதியாகவும் இலங்கக்கோன் பணியாற்றியுள்ளார்.

இவரது தலைமையின் கீழ் வடக்கு கிழக்கில் சிறப்பு அதிரடிப்படை செயற்பட்ட போது பல நூற்றுக்கணக்கான தமிழ் இளைஞர்கள் படுகொலை செய்யப்பட்டது குறிப்பிடத்தக்கது.

http://www.puthinappalakai.com

கொழும்பு காலிமுகத்திடல் கடற்கரையில் நிர்மாணிக்கவிருந்த புதிய நகரத் திட்டம் இடைநிறுத்தம்

கொழும்பு காலிமுகத்திடலை [Galle Face] கடற்கரையை அண்மித்து 500 ஏக்கர் நிலப்பரப்பில் சீனாவின் நிதியுதவியுடன் அமைக்கப்படத் தீர்மானிக்கப்பட்ட 700 மில்லியன் அமெரிக்க டொலர் பெறுமதியான புதிய நகர அமைப்புத் திட்டம் தற்போது இடைநிறுத்தப்பட்டுள்ளது.

'உயர்மட்ட' அதிகாரிகளிடமிருந்து கிடைக்கப் பெற்ற கட்டளையை அடுத்தே இத்திட்டம் இடைநிறுத்தப்பட்டுள்ளதாகவும், இது தொடர்பாக மீள ஆராயப்படவுள்ளதாகவும் உயர் மட்டத் தகவல் மூலம் தெரியவந்துள்ளது.

"நாடாளுமன்றால் நியமிக்கப்படும் மதிப்பாய்வு ஆணைக்குழு நாடாளுமன்றமானது இந்தத் திட்டத்தை ஏற்றுக்கொள்ள வேண்டுமா அல்லது இல்லையா என்பது தொடர்பாக தீர்மானம் எடுக்கும்" என அத்தகவலில் குறிப்பிடப்பட்டுள்ளது.

இத்திட்டம் இடை நிறுத்தப்பட்டதற்கான வேறு காரணங்கள் எதுவும் இதுவரையிலும் கிடைக்கப்பெறவில்லை. முதன் முதலில் புதிய நகர அமைப்புத் திட்டம் தொடர்பான தீர்மானத்தை கடந்த ஒரு ஆண்டிற்கு முன்னர் இடம்பெற்ற UPFA யின் மே தினக் கூட்டத்தில் சிறிலங்கா அதிபர் மகிந்த ராஜபக்ச அறிவித்திருந்தார்.

ஆனால் அம்பாந்தோட்டைத் துறைமுகம் மற்றும் மாத்தாளை விமான நிலையம் போன்ற திட்டங்களை செயற்படுத்துவதில் ஏற்பட்ட முரண்பாடுகளை அடுத்து, காலிமுகத்திடல் கடற்கரையை அண்மித்து அமைக்கத் தீர்மானிக்கப்பட்ட புதிய நகரத் திட்டமானது, சிறிலங்கா நாடாளுமன்றின் சம்மதம் பெறப்பட்ட பின்னரே அமுல்ப்படுத்தப்படும் என மகிந்த ராஜபக்ச அறிவித்திருந்தார்.

மேதினம் அன்று அதிபர் மகிந்த ராஜபக்ச காலிமுகத்திடல் கடற்கரையை அண்மித்த பகுதியில் புதிய நகரம் அமைக்கப் போவதாக அறிவித்த பின்னர், கொழும்பு வாழ் மக்களை பெரிதும் அதிர்ச்சிக்கு உள்ளாக்கியதுடன், இதற்கெதிரான தமது ஆர்ப்பாட்டங்களையும் மேற்கொண்டனர்.

அத்துடன் பிரபலம்மிக்க காலிமுகத்திடல் கடற்கரையின் முக்கியத்துவம் இத்திட்டத்தின் மூலம் இழக்கப்பட்டுவிடும் என்பதை நினைத்து சூழலியலாளர்கள் மிகவும் அச்சமுற்றிருந்தனர்.

கொழும்புத் துறைமுகப் பகுதியிலிருந்து பழைய நாடாளுமன்றக் கட்டடம் அமைக்கப்பட்டிருந்த [தற்போது சிறிலங்கா அதிபர் செயலகம்] இடம் வரையிலான நிலப்பரப்பிலேயே சீன நிதியுதவியுடனான இப் புதிய நகரை அமைப்பதென திட்டமிடப்பட்டது.

அதாவது பல மில்லியன் கணக்கான மக்கள் தமது மன அமைதிக்காகவும் கடற்காற்றை சுவாசிப்பதற்காகவும் பின்னேரப் பொழுதுகளைக் கழிக்கின்ற கொழும்பு காலிமுகத்திடல் கடற்கரைப் பகுதி இத்திட்டத்திற்குள் உள்ளடக்கப்படவில்லை.

700 மில்லியன் அமெரிக்க டொலரில் அமைக்கப்படவுள்ள புதிய நகர்த்திட்டம் தொடர்பாக கொழும்பில் அண்மையில் இடம்பெற்ற கப்பல் போக்குவரத்துத் தொடர்பான கலந்துரையாடலில் சிறிலங்கா துறைமுக அதிகாரசபைத் தலைவர் பிறியத் விக்கிரம தெரிவித்திருந்தார்.

ஆனால் இதற்கான முதலீட்டை மேற்கொள்ளவுள்ள நாட்டையோ அல்லது குறிப்பிட்ட முதலீட்டாளர் தொடர்பான எந்தவொரு தகவலையும் இவர் குறிப்பிடவில்லை.

இந்நிலையில் இத்திட்டம் தொடர்பான மறுமதிப்பீட்டை நாடாளுமன்றத்தால் நியமிக்கப்படும் ஆணைக்குழுவானது மேற்கொண்ட பின்னரே இது தொடர்பான சரியான தீர்வு எட்டப்படும் என உயர்மட்டத் தகவலில் தெரிவிக்கப்பட்டுள்ளது.

செய்தி வழிமூலம்: The Sunday Times
http://www.puthinappalakai.com

பயர்பாக்ஸ் 5 வெளியானது

மொஸில்லா தான் அறிவித்த படியே, பயர்பாக்ஸ் பதிப்பு 5னை சென்ற ஜூன் 21 அன்று வெளியிட்டது. பெர்சனல் கம்ப்யூட்டர் களில் பயன்படுத்த ஒரு தொகுப்பும், ஆண்ட்ராய்ட் மொபைல் போன்களில் பயன்படுத்த ஒரு தொகுப்புமாய், இரண்டு பிரவுசர்கள் வெளியாகியுள்ளன. பயர்பாக்ஸ் பதிப்பு 4 வெளியாகி சில நாட்களிலேயே இது வெளியாகியுள்ளது இங்கு குறிப்பிடத் தக்கது. விண்டோஸ். மேக் சிஸ்டம், லினக்ஸ் மற்றும் ஆண்ட்ராய்ட் போன் என அனைத்து வகை கம்ப்யூட்டர் சிஸ்டங்களிலும் இயங்கும் வகையில் பயர்பாக்ஸ் 5 வெளியாகியுள்ளது.
பயர்பாக்ஸ் பதிப்பு 3, 2008 ஆம் ஆண்டில் வெளியானது. ஏறத்தாழ மூன்று மாதங்களுக்கு முன் தான் பயர்பாக்ஸ் 4ன் சோதனைத் தொகுப்பு வெளியாகிப் பின்னர் முழுமையான தொகுப்பும் உடனடியாகக் கிடைத்தது. இப்போது பயர்பாக்ஸ் 5 வந்துள்ளது. இது ஏறத்தாழ, பயர்பாக்ஸ் பதிப்பு 4ல் உள்ள பாதுகாப்பு பிரச்னைகளுக்கான தீர்வுகளுடன் அமைக்கப்பட்ட பிரவுசராக உள்ளது. எனவே பயர்பாக்ஸ் பதிப்பு 4ல் குறை காண்பவர்கள், அதற்குத் தீர்வாக பேட்ச் அப் பைல் எதனையும் எதிர்பார்க்காமல், பதிப்பு 5னை டவுண்லோட் செய்து பயன்படுத்தலாம்.
முன்பு மைக்ரோசாப்ட் நிறுவனத்தின் பிரவுசரரான இன்டர்நெட் எக்ஸ்புளோரர் பிரவுசருக்குப் போட்டியாகவே பயர்பாக்ஸ் வடிவமைப்பும் வெளியிடுவதும் இருந்து வந்தன. இப்போது கூகுள் நிறுவனத்தின் குரோம் பிரவுசருடன் மொஸில்லா போட்டியிட வேண்டியுள்ளது. எனவே கூகுள் போலவே, மூன்று மாதங்களுக்கு ஒரு முறை புதிய பிரவுசர் வெளியிடுவதை வழக்கமாக மொஸில்லா கொண்டுள்ளது.
இன்டர்நெட் உலகம் மிக வேகமாக மாற்றங்களை அடைந்து வருகிறது. அதற்கு ஈடு கொடுக்க, புதிய மாற்றங்களுடன் பிரவுசர்களை மக்களுக்கு வழங்க வேண்டியுள்ளது என, 5 ஆம் பதிப்பினை வெளியிடுகையில், மொஸில்லா தலைமை நிர்வாகி கேரி கொவாக்ஸ் குறிப்பிட்டார்.
இந்த தொகுப்பில் உள்ள புதிய அம்சங்கள்:
1.சி.எஸ்.எஸ். அனிமேஷன்களை எளிதாக இயக்கலாம். இதனால் இணைய ஆப்ஜெக்ட்களை திரையைச் சுற்றி அமைக்கலாம். இதனால் டைனமிக் என்ற முறையில் இயங்கும் இணைய தளங்களை எளிதாகப் பார்க்கலாம்.
2. இணையத்தில் உலா வருகையில், நம்மைப் பின்பற்றாமல் பிரவுசர் இயங்க வேண்டும். விளம்பரம் மற்றும் பிற சுயநல வேலைகளுக்கு நம்முடைய தனிப்பட்ட விருப்பங்களை, நாம் செல்லும் இணைய தளங்களை அறியும் வகையில் இயக்கங்கள் அமைந்திடும். இதனை இந்த பிரவுசர் தடுக்கிறது. ஆண்ட்ராய்ட் போனுக்கான பிரவுசர் தொகுப்பிலும் இந்த தடுப்பு வசதி தரப்பட்டுள்ளது.
3. கிராபிக்ஸ் தொழில் நுட்பத்தில், இரு பரிமாணப்படங்களைத் தரும் கேன்வாஸ் (Canvas) தொழில் நுட்பம் இந்த பிரவுசரில் தரப்பட்டுள்ளது.
4. ஆட் ஆன் பில்டர் (Addon Builder) என்ற ஒரு வசதி இதில் இணைக்கப் பட்டுள்ளது. இது இன்னும் சோதனை முயற்சியிலேயே உள்ளதாகக் கூறப் படுகிறது. பயர்பாக்ஸ் பிரவுசருக்கான ஆட் ஆன் எக்ஸ்டன்ஷன் எழுதுவதனை இது எளிதாக்கும்.
5.பிரவுசர் இயக்கத்திற்கு எடுத்துக் கொள்ளும் நேரம் வெகுவாகக் குறைக்கப்பட்டுள்ளது. அத்துடன் 25 இணைய தளங்களை ஒரே நேரத்தில் இதில் திறந்து வைத்து இயக்கினாலும், குறைந்த அளவிலான ராம் மெமரியையே இது பயன்படுத்துகிறது.
6. இதில் ஆயிரத்திற்கும் மேலான எண்ணிக்கையில் வேகம் மற்றும் முன்னேற்றத்திற்கான மாற்றங்கள் ஏற்படுத்தப்பட்டுள்ளன. இவற்றைத் தனியாக அடையாளம் கண்டு நாம் அறிய முடியாது. ஆனால் பெரிய அளவில், அனைத்து வகை செயல்பாடு களிலும் விரும்பத்தக்க மாற்றங்கள் பல ஏற்படுத்தப்பட்டுள்ளன. இவற்றில் பெரும்பாலானவை சென்ற பதிப்பில் உள்ள குறைகளை நிவர்த்தி செய்திடும் வகையில் உருவாக்கப்பட்டவையே.
7. இது ஒரு வேகமான, பாதுகாப்பான மற்றும் திறன் மிக்கது என பிரவுசர் களுக்கான சோதனைகளில் தெரிய வந்துள்ளது. தேவையற்ற விளம்பரங் களை இதில் இணைந்துள்ள ஆட் பிளாக்கர் என்னும் விளம்பரத் தடுப்பு புரோகிராம் தடுக்கிறது.
8. ஒரே விண்டோவில் ஒன்றுக்கு மேற்பட்ட தளங்களைத் திறந்து இயக்கலாம். பாதுகாப்பினை முன்னிட்டு, கெடுதல் விளைவிக்கும் புரோகிராம் களைத் தடுப் பதற்காக, ஆக்டிவ் எக்ஸ் கண்ட்ரோல்களை இந்த பிரவுசர் அனுமதிப்பதில்லை.
ஓப்பன் சோர்ஸ் பிரவுசர்களைத் தந்து வரும் மொஸில்லா, தன் பதிப்பு 4ஐ முற்றிலுமாக பெரிய அளவில் மாற்றி அமைத்திருந்தது. அந்த பிரவுசர் 20 கோடிக்கும் மேலான எண்ணிக்கையில் டவுண்லோட் செய்யப்பட்டது என மொஸில்லா அறிவித்திருந்தது. இனி தொடர்ந்து, குறுகிய காலத்தில் அடுத்தடுத்து பிரவுசர்கள் வந்தாலும், ஏற்கனவே வடிவமைக்கப்பட்ட இணைய தளங்கள், புதியனவற்றில் இயங்கு வதற்குத் தடை இருக்காது. பயர்பாக்ஸ் 4 அடிக்கடி கிராஷ் ஆவதாகப் பலர் புகார் அளித்திருந்தனர். பதிப்பு 5 அதனைச் சரி செய்துள்ளது. அது மட்டுமின்றி, மொஸில்லா நிறுவனம், இனி பயர்பாக்ஸ் 4 பிரச்னைகளுக்குத் தீர்வளிக்காது. தன் வாடிக்கையாளர்களுக்கு இதனைக் கூறி, பயர்பாக்ஸ் பதிப்பு 5னை இன்ஸ்டால் செய்து பயன்படுத்துமாறு மொஸில்லா கூறியுள்ளது. இதுவரை பயன்படுத்தி வந்த ஆட் ஆன் எக்ஸ்டன்ஸன் புரோகிராம்கள், பதிப்பு 5லும் இணைந்து செயல்படும்.
வர இருக்கும் பயர்பாக்ஸ் பதிப்பு 6,7,8, 9, 10 ஆகியவையும் முக்கியமானவை யாகவே இருக்கும். இருப்பினும் இந்த பயர்பாக்ஸ் பதிப்பு 5 மட்டுமே, ஆரவாரத்துடன் வெளிவந்துள்ளது. அடுத்தடுத்து பிரவுசர்கள் வர இருப்பதால், இணையதள வடிவமைப் பாளர்களும் ஒரு எதிர்பார்ப்பில் இருப்பார் கள். மாற்றங்களை எதிர்கொள்ள தயாராக இருப்பார்கள் என மொஸில்லா தலைமை நிர்வாகி கூறியுள்ளார்.
வரும் ஆகஸ்ட் மாதம் அடுத்த பதிப்பினை எதிர்பார்க்கலாம்.
http://www.dinamalar.com/Supplementary_detail.asp?id=5949&ncat=4

3 நாட்களுக்கு 'ஹெட்லைன்ஸ் டுடே' டிவியில் 'இலங்கையின் கொலைக்களம்' ஒளிபரப்பு

சென்னை: லண்டன் சேனல் 4 தொலைக்காட்சி ஒளிபரப்பிய இலங்கையின் கொலைக்களம் என்ற தலைப்பிலான இலங்கை இனப்படுகொலை குறித்த வீடியோ படத்தை இந்தியாவிலேயே முதல் முறையாக ஹெட்லைன்ஸ் டுடே டிவி 3 நாட்களுக்கு ஒளிபரப்பவுள்ளது.

ஈழப் பிரச்சினை குறித்து இந்தியாவைச் சேர்ந்த ஆங்கில மீடியாக்கள் ஒரு போதும் கவலைப்பட்டது கிடையாது. இலங்கை அரசுக்கு சாதகமான செய்தி என்றால் மட்டுமே அவை செய்திகளை ஒளிபரப்பும். இலங்கை அரசு என்ன செய்தாலும் அவர்களுக்கு கவலை இல்லை.

லண்டனைச் சேர்ந்த, தமிழர்களுக்கு சற்றும் ரத்த சம்பந்தமோ, கலாச்சார சம்பந்தமோ இல்லாத சேனல் 4 தொலைக்காட்சி நிறுவனத்தினர்இலங்கையில் நடந்த இனப்படுகொலை குறித்த புகைப்படங்கள், வீடியோக்கள், செய்திகளை வெளியிட்டு உலகையே உலுக்கியபோதும் அதுகுறித்து கிஞ்சித்தும் கவலைப்படாதவை நமது இந்திய ஆங்கில ஊடகங்கள்.

இலங்கையின் கொலைக்களம் என்ற பெயரில் இலங்கையில் போரின் கடைசிக்கட்டத்தில் நடந்த மிகக் கொடூரமான இனப்படுகொலை சம்பவங்களின் தொகுப்பைப் பார்த்து இங்கிலாந்து நாடாளுமன்றமே அலறியது. ஆனால் இந்தியாவில் மட்டும் எந்த ஒரு சலனமும் இல்லை. ஆங்கில மீடியாக்கள் அதை ஒரு செய்தியாகக் கூட பார்க்கவில்லை, வெளியிடவில்லை.

இப்படிப்பட்ட துயரமானநிலையில், ஹெட்லைன்ஸ்ட் டுடே இலங்கையின் கொலைக்களம் வீடியோ படத்தை ஒளிபரப்பவுள்ளது.

ஜூலை 7ம் தேதி இரவு 11 மணிக்கும், ஜூலை 8ம் தேதி இரவு பத்து மணிக்கும், ஜூலை 9ம் தேதி இரவு 11 மணிக்கும் இந்த வீடியோ டாக்குமென்டரி படம் ஒளிபரப்பாகவுள்ளது.

http://thatstamil.oneindia.in/news/2011/07/04/headlines-today-telecast-sri-lanka-killing-fields-aid0091.html

கூகுள் ப்ளஸ்... குவியும் ஆதரவு... திணறும் சர்வர்!

பேஸ்புக்குக்கு போட்டியாக கூகுள் ஆரம்பித்துள்ள கூகுள் ப்ளஸ் சேவையின் சோதனை ஓட்டமே பெரும் வெற்றியாக அமைந்துள்ளது.

இந்த சமூக தளத்தில் இணைய லட்சக்கணக்கான மெயில்கள் குவிந்துவிட்டன. இதன் விளைவு, கூகுள் ப்ளஸ் அழைப்பு அனுப்ப முடியாத அளவுக்கு திணறிவிட்டது.

எனவே, 'மன்னிக்கவும், அழைப்பு அனுப்ப முடியாத அளவுக்கு வாடிக்கையர் மெயில்கள் குவிந்துவிட்டன. சோதனை ஓட்டம் முடிந்த பிறகு அனைவரும் பயன்படுத்தும் வகையில் கூகுள் ப்ளஸ் செயல்படும்' என அறிவிப்பு வெளியிட்டுள்ளார் அந்நிறுவனத்தின் சமூகத் தள பொறுப்பாளர் குண்டோத்ரா.

பல கோடி பேர் ஒரே நேரத்தில் பயன்படுத்தினாலும், தாங்கும் அளவுக்கு இந்த கூகுள் ப்ளஸை பலமான தளமாக உருவாக்கி வருகிறது கூகுள்.

பேஸ்புக்கில் வருவதுபோன்ற ஸ்பேம் செய்தி தொல்லைகள் இந்த கூகுள் ப்ளஸில் இல்லாத அளவுக்கு கோடிங் உருவாக்கப்பட்டு வருவதாக கூகுள் தரப்பில் கூறப்பட்டுள்ளது.

ஆப்பிள் இயங்கு தளத்தில் செயல்படும் ஐபோன்களுக்காகவே மொபைல் கூகுள் ப்ளஸ் என்ற மென்பொருளையும் அறிமுகப்படுத்தியுள்ளது கூகுள்.

முழுமையாக கூகுள் ப்ளஸ் பயன்பாட்டுக்கு வரும் தருணத்தில் ட்விட்டர் மற்றும் பேஸ்புக் இரண்டுமே பெரும் சரிவைச் சந்திக்கும் என்று இப்போது கணிப்புகளை வெளியிட ஆரம்பித்துள்ளன சைபர் உலக ஜாம்பவான் நிறுவனங்கள்.
http://thatstamil.oneindia.in/news/2011/07/04/google-plus-threat-facebook-twitter-aid0136.html

திமுக நிகழ்ச்சிகளுக்கு எனது படத்தைப் போட வேண்டாம்: மு.க. அழகிரி!

திமுகவினரின் குடும்ப நிகழ்ச்சிகளுக்கு எனது பெயரையோ படத்தையோ போட வேண்டாம் என மு.க. அழகிரி கேட்டுக் கொண்டுள்ளார்.

மதுரை மாநகர முன்னாள் துணைமேயரும் மதுரை மாநகர் மாவட்ட தி.மு.க. பொருளாளருமான மிசா.எம்.பாண்டியன்- பாண்டி செல்வி தம்பதியரின் மகள் பா.பாண்டிராணிக்கும் காவல் ஆய்வாளர் பாஸ்கர்- கிரகலெட்சுமி தம்பதியரின் மகன் தங்க அரவிந்த்துக்கும் இன்று காலை மதுரை சத்திய சாய் நகரில் உள்ள தயா மகாலில் திருமணம் நடைபெற்றது. இந்தத் திருமணத்தை மத்திய அமைச்சர் மு.க.அழகிரி நடத்தி வைத்து பேசியதாவது:

தமிழ்நாட்டிலேயே மதுரை மாவட்டத்திற்குதான் கடந்த தி.மு.க. ஆட்சியில் முதியோர் உதவித்தொகை மற்றும் நலத்திட்ட உதவிகள் அதிக அளவில் செய்யப்பட்டு உள்ளது. அப்படி இருந்தும் மதுரை மாவட்டத்தில் ஒரு தொகுதியில் கூட வெற்றி பெற முடியாமல் போய்விட்டது.

எனது கட்சிக்காரர்களுக்குதான் நிறைய உதவிகள் செய்து இருக்கிறேன். கடந்த தேர்தலில் தோல்வி என்றதும் தி.மு.க. குடும்ப அரசியல் செய்வதாக மாற்றுக் கட்சிகாரர்களை விட நமது கட்சிக்காரர்கள் விமர்சனம் செய்கிறார்கள்.

இது எனது மனதுக்கு வேதனை அளிக்கிறது. நமது கட்சிக்காரர்களின் குடும்ப நிகழ்ச்சியில் எனது குடும்பத்தினர் பெயரையோ படத்தையோ இனி போட வேண்டாம். அப்படிப் போட நினைத்தால் பேரறிஞர் அண்ணா படம், தலைவர் கருணாநிதி ஆகியோரின் பெயர் படத்தை மட்டும் போட்டால் போதும். மனப்பூர்வமாக என் படத்தையோ என் பெயரையோ போட நினைத்தால் மட்டும் போடுங்கள்.

என் குடும்பத்தினரின் படத்தையோ பெயரையோ போடவேண்டாம். அவ்வாறு செய்தால் அண்ணாவின் மீது ஆணையிட்டு சொல்கிறேன் நான் அந்த நிகழ்ச்சிக்கு வரமாட்டேன். கட்சியில் உள்ள அனைவரும் ஒற்றுமையாக இருந்து கட்சி வளர்ச்சிக்கு பாடுபட வேண்டும் என்று கேட்டு கொள்கிறேன்.

இவ்வாறு மு.க. அழகிரி பேசினார்

http://www.inneram.com/2011070317651/dont-use-my-photos-and-name-azhagiri-tells-party-men

சன்பிக்சர்ஸ் தலைமை நிர்வாகி ச‌க்சேனா ‌சிறை‌யி‌‌ல் அடை‌ப்பு

ஒ‌ன்றேமு‌க்கா‌ல் கோடி ரூபா‌ய் மோசடி புகாரின் பேரில் கைது செ‌ய்ய‌ப்ப‌ட்ட 'சன்பிக்சர்ஸ்'' பட நிறுவனத்தின் தலைமை நிர்வாகி சக்சேனா புழ‌ல் ‌சிறை‌யி‌ல் அடை‌க்க‌ப்ப‌ட்டா‌ர்.

சேலத்தைச் சேர்ந்த சினிமா பட வினியோகஸ்தரான டி.எஸ்.செல்வராஜ், "கந்தன் பிலிம்ஸ்'' என்ற பட நிறுவனத்தை நடத்தி வருகிறார். இவர் சென்னை காவ‌ல்துறை ஆணைய‌ர் திரிபாதியிடம் கொடு‌த்து‌ள்ள புகார் மனு‌வி‌ல், நான் சினிமா வினியோகஸ்தர் தொழில் செய்கிறேன். "சன்பிக்சர்ஸ்'' பட நிறுவனத்தினர் தயாரித்து வெளியிட்டுள்ள "தீராத விளையாட்டுப்பிள்ளை'' படத்தின் சேலம் பகுதி வினியோக உரிமையை வாங்கும்படி, சன் பிக்சர்ஸ் நிறுவனத்தின் தலைமை நிர்வாகி ஹன்ஸ்ராஜ் சக்சேனா என்னை வற்புறுத்தினார்.

அதன்பேரில், ஒ‌ன்றே மு‌க்கா‌ல் கோடி கடன் வாங்கி கொடுத்து அந்த படத்தின் வினியோக உரிமையை வாங்கினேன். ஆனால் அந்த படத்தை சக்சேனாவே சேலம் பகுதியில் வெளியிட்டுவிட்டார். நான் கொடுத்த ஒ‌ன்றே மு‌க்கா‌ல் கோடி பணத்தையும் திருப்பி தரவில்லை.

அந்த படத்திற்கு வசூலான 83 லட்சத்து 53 ஆயிரத்து 374 ரூபாயை தரும்படி கேட்டேன். ஆனால் சக்சேனா தராமல் இழுத்தடித்தார். கடந்த ஜனவரி மாதம் அதுபற்றி கேட்டபோது என்னை கொலை செய்துவிடுவதாக மிரட்டினார். அவர் மீது சட்டப்பூர்வ நடவடிக்கை எடுத்து பணத்தை வசூலித்து தரும்படி கேட்டுக்கொள்கிறேன் எ‌ன்று மனுவில் கூறியிருந்தார்.

இந்த புகார் மனு மீது சென்னை கே.கே.நகர் காவ‌ல்துறை‌யின‌ர், கொலை மிரட்டல், மோசடி உள்பட 4 சட்டப்பிரிவுகளின் கீழ் ச‌க்சேனா ‌மீது வழக்குப்பதிவு செய்து விசாரித்து வ‌ந்தன‌ர்.

‌இ‌ந்த‌நிலை‌யி‌ல் நே‌ற்‌றிரவு 7 மணி அளவில் ஹைதராபாத்தில் இருந்து விமானத்தில் சென்னை வந்த ச‌க்சேனாவை விமான நிலையத்தில் வைத்து கே.கே.நகர் காவ‌ல்துறை‌யின‌ர் கைது செய்தனர்.

பின்னர் அவரை அசோக்நகர் உதவி காவ‌ல்துறை ஆணைய‌ர் அலுவலகத்திற்கு அழைத்து சென்றனர். அங்கு வைத்து அவரிடம் விசாரணை நடத்தப்பட்டது. இதை‌த் தொட‌ர்‌ந்து புழ‌ல் ம‌த்‌திய ‌சிறை‌யி‌ல் ச‌க்சேனா அடை‌க்க‌ப்ப‌ட்டா‌‌ர்.
http://tamil.webdunia.com/newsworld/news/tnnews/1107/04/1110704009_1.htm

சன் "டிவி' நிர்வாக அதிகாரி கைது

சென்னை : சினிமா அதிபரிடம் 82 லட்ச ரூபாய் மோசடி செய்த வழக்கில், சன், "டிவி' நிர்வாக அதிகாரி ஹன்ஸ்ராஜ் சக்சேனாவை, போலீசார் நேற்றிரவு கைது செய்தனர். சேலத்தைச் சேர்ந்தவர் டி.எஸ்.செல்வராஜ். கந்தன் பிலிம்ஸ் என்ற சினிமா தயாரிப்பு நிறுவனத்தை நடத்தி வருகிறார். "தீராத விளையாட்டுப் பிள்ளை' என்ற சினிமாவை எடுத்தார். அவர் இரண்டு நாட்களுக்கு முன், சென்னை மாநகர போலீஸ் கமிஷனர் திரிபாதியை சந்தித்து, புகார் ஒன்றை கொடுத்தார்.
அந்த புகாரில் கூறியிருப்பதாவது: நான் தயாரித்த, "தீராத விளையாட்டுப் பிள்ளை' படத்திற்கான வினியோக உரிமையைத் தருமாறு, சன், "டிவி' நிர்வாகம் மிரட்டியது. மிரட்டல் அதிகரித்ததால், வேறு வழியின்றி செலவுத்தொகை 1.25 கோடி ரூபாயை தருமாறு கேட்டு, படத்தின் வினியோக உரிமையை சன், "டிவி' நிர்வாகத்திடம் கொடுத்தேன். படம் வினியோகம் செய்யப்பட்டு, நல்ல வசூலை எட்டியது. பேசியபடி, 1.25 கோடி ரூபாயை தராமல், குறைந்த தொகையை மட்டுமே தந்தனர். மீதம், 82.53 லட்ச ரூபாய் பணத்தை, பல மாதங்கள் ஆகியும் தரவில்லை. பாக்கி பணத்தைக் கேட்டபோது, "பணம் தர முடியாது. உன்னால் முடிந்ததைச் செய்து கொள்' என, மிரட்டினர்.
மிரட்டல் விடுக்கும் சன்,"டிவி' நிர்வாக அதிகாரி ஹன்ஸ்ராஜ் சக்சேனா மீது சட்டப்படி நடவடிக்கை எடுத்து, எனக்கு பணத்தைப் பெற்றுத் தர வேண்டும்.இவ்வாறு செல்வராஜ் புகாரில் கூறியிருந்தார்.கமிஷனர் திரிபாதி உத்தரவின்படி, கே.கே.நகர் போலீசார் வழக்கு பதிந்து விசாரணை நடத்தி வந்தனர். அசோக்நகர் உதவி கமிஷனர் குருசாமி தலைமையிலான தனிப்படையினர், ஹன்ஸ்ராஜ் சக்சேனாவை நேற்றிரவு சென்னையில் கைது செய்தனர். புகார் குறித்து, தீவிர விசாரணை நடந்து வருகிறது.
http://www.dinamalar.com/News_Detail.asp?Id=269232

2ஜி ஊழல் வழக்கு: சிறப்பு நீதிமன்றத்தில் இன்று மீண்டும் விசாரணை-கனிமொழி, ராசா ஆஜர்

டெல்லி: கோடை விடுமுறைக்கு பின் இன்று திறக்கப்படும் டெல்லி சிறப்பு நீதிமன்றத்தில் 2ஜி ஸ்பெக்ட்ரம் வழக்கு விசாரணை மீண்டும் துவங்கவிருக்கிறது.

விசாரணையைத் தொடர்ந்து கனிமொழி, ராசா உள்ளிட்டோர் சிறப்பு சிபிஐ கோர்ட்டில் ஆஜர்படுத்தப்படுகின்றனர்.

2ஜி ஸ்பெக்ட்ரம் வழக்கு டெல்லி சிறப்பு சிபிஐ நீதிமன்றத்தில் நடந்து வருகிறது. கோடை விடுமுறைக்காக மூடப்பட்ட நீதிமன்றம் இன்று திறக்கப்படுகிறது. இதையடுத்து 2ஜி உள்ளிட்ட பல வழக்கு விசாரணை இன்று மீண்டு துவங்குகிறது.

2ஜி விவகாரத்தில் முன்னாள் அமைச்சர் ஆ.ராசா, கனிமொழி எம்.பி., கலைஞர் டிவி இயக்குனர் சரத் குமார் ஆகியோர் கைது செய்யப்பட்டு திஹார் சிறையில் அடைக்கப்பட்டுள்ளனர். கனிமொழி எம்பிக்கு ஜாமீன் கொடுக்க மறுத்த உச்ச நீதிமன்றம் சிறப்பு நீதிமன்றத்தில் ஜாமீன் கேட்டு விண்ணப்பிக்குமாறு அவரிடம் கூறியது.

இந்நிலையில் விடுமுறை முடிந்து இன்று நீதிமன்றம் திறக்கப்படுகிறது. இதையடுத்து 2ஜி ஊழல் வழக்கு விசாரணை மீண்டும் துவங்குகிறது. இந்த வழக்கில் இதுவரை 2 குற்றப்பத்திரிக்கைகளை சிபிஐ தாக்கல் செய்துள்ளது. இதில் 14 தனி நபர்கள் மற்றும் 3 தொலைத் தொடர்பு நிறுவனங்கள் உள்பட மொத்தம் 17 பேர் மீது குற்றம் சாட்டப்பட்டுள்ளது.

ஜூலை 2-வது வாரத்தில் தனது மூன்றாவது குற்றப்பத்திரிக்கையை சிபிஐ தாக்கல் செய்யப்படும் என்று தெரிகிறது.

முதல் குற்றப்பத்திரிக்கை ஏப்ரல் 2-ம் தேதி தாக்கல் செய்யப்பட்டது. அதில் ராசா, பல்வா, முன்னாள் தொலைத் தொடர்புத்துறை செயலாளர் சித்தார்த் பஹுரா, ராசாவின் உதவியாளர் சந்தோலியா, யூனிடெக் நிறுவன எம்.டி. சஞ்சய் சந்திரா, டிபி ரியாலிட்டி பிரமோட்டர் வினோத் கோயங்கா, ரிலையன்ஸ் அடாக் அதிகாரிகள் ஹரி நாயர், சுரேந்திர பிபாரா, கௌதம் தோஷி ஆகியோரின் பெயர்கள் இடம் பெற்றன.

2-வது குற்றப்பத்திரிக்கையில் கனிமொழி, கலைஞர் டிவி நிர்வாக இயக்குநர் சரத்குமார் ரெட்டி ஆகியோரின் பெயர்கள் இடம் பெற்றன என்பது நினைவிருக்கலாம்.

முனனாள் அமைச்சர் ராசா, திமுக எம்.பி. கனிமொழி, ஸ்வான் டெலிகாம் நிறுவன பிரமோட்டர் ஷாஹித் உஸ்மான் பல்வா உள்ளிட்ட 14 பேர் சிறப்பு நீதிமன்ற நீதிபதி ஓ.பி.ஷைனி முன்பு இன்று ஆஜர்படுத்தப்படுகின்றனர்.

http://thatstamil.oneindia.in/news/2011/07/04/2g-scam-spl-court-resume-hearing-today-aid0128.html

சட்ட அமைச்சர் பதவியிலிருந்து இசக்கி சுப்பையா நீக்கப்பட்டது ஏன்?

நெல்லை: தமிழகத்தில் 2வது முறையாக நடந்த அமைச்சரவை மாற்றத்தில் சட்ட அமைச்சர் இசக்கி சுப்பையா பதவியை இழந்துள்ளார். கடையநல்லூர் தொகுதி எம்எல்ஏ செந்தூர்பாண்டியன் கதர்துறை அமைச்சராகியுள்ளார். இது அமைச்சரவை மாற்றமாக மட்டும் நெல்லை மாவட்டத்தில் பார்க்கப்படவில்லை. மாறாக, நெல்லை மாவட்ட அதிமுகவினரை பெரும் சலசலப்பில் இந்த அமைச்சரவை மாற்றம் ஆழ்த்தியுள்ளது.

தமிழக அமைச்சரவை நேற்று 2வது முறையாக மாற்றியமைக்கப்பட்டது. இதில் சட்டத்துறை அமைச்சராக இருந்த இசக்கி சுப்பையா நீக்கப்பட்டார். புதிய அமைச்சராக கடையநல்லூர் எம்எல்ஏ செந்தூர்பாண்டியன் நியமிக்கப்பட்டுள்ளார்.

நெல்லை புறநகர் மாவட்ட செயலாளராக இருந்த செந்தூர்பாண்டியன் இம்முறை சட்டசபை தேர்தலில் முதன்முறையாக போட்டியிட்டு வெற்றி பெற்றார். அவர் நேற்று அமைச்சராக அறிவிக்கப்பட்டதன் மூலம் கடையநல்லூர் தொகுதிக்கு விஐபி அந்தஸ்து கிடைத்துள்ளது.

நெல்லை மாவட்ட அதிமுகவில் அடுத்தடுத்து நடக்கும் அதிரடியால் கட்சியினர் கலக்கத்தில் உள்ளனர். சட்டசபை தேர்தலில் அதிமுக வெற்றி பெற்றவுடன் பலரும் நெல்லை தொகுதி எம்எல்ஏ நயினார் நாகேந்திரனுக்கு அமைச்சர் பதவி கிடைக்கும் என எதிர்பார்த்தனர். ஆனால் யாருமே எதிர்பாராத வகையில் அம்பை தொகுதியி்ல் இருந்து இசக்கி சுப்பையாவுக்கு அமைச்சர் பதவி கிடைத்தது.

சட்டத்துறை அமைச்சராக இருந்த இசக்கி சுப்பையாவும், கால்நடை அமைச்சராக இருந்த கருப்பசாமியும் கடந்த மே 16ம் தேதி பொருப்பேற்றனர்.

இந்த நிலையில், கடந்த வாரத்தில் நெல்லை மாவட்ட அதிமுகவில் அதிரடி மாற்றங்கள் நிகழ்ந்தன. நெல்லை புறநகர், மாநகர் மாவட்ட நிர்வாகிகள், அணி நிர்வாகிகள் கூண்டோடு நீக்கப்பட்டனர். புறநகர் மாவட்ட செயலாளராக இரு்ந்த எம்எல்ஏ செந்தூர்பாண்டியன், ஓருங்கிணைந்த மாவட்ட செயலாளராக நியமிக்கப்பட்டார். புதிய நிர்வாகிகள் விரைவில் நியமிக்கப்படுவர் என அதிமுக தலைமை அறிவித்தது.

இதற்கிடையில் அமைச்சர் கருப்பசாமியிடம் இருந்த கால்நடை துறை பறிக்கப்பட்டு இளைஞர் நலன் மற்றும் விளையாட்டு துறை வழங்கப்பட்டது. நேற்று இரண்டாவது முறையாக நடந்த அமைச்சரவை மாற்றத்தில் இசக்கி சுப்பையாவிடம் இருந்து பறிக்கப்பட்ட சட்டதுறை, செய்தி துறை அமைச்சர் செந்தமிழனிடம் கூடுதலாக வழங்கப்பட்டது.

கடையநல்லூர் தொகுதி எம்எல்ஏ செந்தூர்பாண்டியன் புதிய அமைச்சராக அறிவிக்கப்பட்டார். நெல்லை அதிமுகவில் தொடர்ந்து நடந்து வரும் அதிரடி மாற்றங்களினால் கட்சியினர் மத்தியில் அடுத்தடுத்த என்ன என்கிற பரபரப்பு நிலவுகிறது.

நில ஆக்கிரமிப்பு காரணமா?

இதற்கிடையே இசக்கி சுப்பையாவின் நீக்கத்திற்கு நில ஆக்கிரமிப்பு விவகாரமே காரணம் என்று பரபரப்பாக பேசப்படுகிறது.

சென்னையின் பிரதான பகுதியில் நில ஆக்கிரமிப்பு விவகாரத்தில் அமைச்சர் இசக்கி சுப்பையா ஈடுபட்டதாக கூறப்படுகிறது. இந்தக் குற்றச்சாட்டு முதல்வர் காதுகளுக்குப் போனது. இதையடுத்தே அவரை முதல்வர் ஜெயலலிதா நீக்கியதாக கூறப்படுகிறது.

முதல் நீக்கம்

ஜெயலலிதா அமைச்சரவையிலிருந்து நீக்கப்பட்ட முதல் அமைச்சர் என்ற பெயர் இசக்கி சுப்பையாவுக்குக் கிடைத்துள்ளது.

இதுவரை ஜெயலலிதா அமைச்சரவையில் சிறிய அளவிலான மாற்றங்களே நடைபெற்றுள்ளன. ஆனால் பதவியேற்ற 2 மாதத்திற்குள் ஒரு அமைச்சர் நீக்கப்பட்டிருப்பதால் பரபரப்பும் ஏற்பட்டுள்ளன.
http://thatstamil.oneindia.in/news/2011/07/04/land-grabbing-let-dismiss-isakki-subbiah-aid0175.html

மீண்டும் அமைச்சரவை மாற்றம்-சட்ட அமைச்சர் இசக்கி சுப்பையா நீக்கம்-செந்தூர்ப்பாண்டியன் புதிய அமைச்சர்

சென்னை : தமிழக சட்டத்துறை அமைச்சர் இசக்கி சுப்பையா இன்று அதிரடியாக நீக்கப்பட்டார். புதிய அமைச்சராக கடையநல்லூர் எம்.எல்.ஏ. செந்தூர்ப்பாண்டியன் நியமிக்கப்பட்டுள்ளார்.

தமிழக அமைச்சரவையில் 2வது முறையாக இன்று முதல்வர் ஜெயலலிதா மாற்றம் செய்தார்.

சட்ட அமைச்சராக இருந்து வந்த இசக்கி சுப்பையா திடீரென நீக்கப்பட்டுள்ளார். அவரது சகோதரி மகள் சமீபத்தில் தனது காதலருடன் வீட்டை விட்டு வெளியேறி, மதுரை போலீஸ் கமிஷனர் அலுவலகத்தில் தஞ்சமடைந்த சம்பவம் பெரும் பரபரப்பை ஏற்படுத்தியுள்ளது. தனது குடும்பத்தினரால் மிரட்டல் இருப்பதாகவும் இசக்கி சுப்பையாவின் சகோதரி மகள் புகார் கூறியிருந்தார். இருப்பினும் பின்னர் இரு குடும்பத்தினரும் சமாதானமடைந்து திருமண வரவேற்பை நடத்தினர். இந்த நிலையில்தான் இசக்கி சுப்பையா திடீரென பதவியிலிருந்து நீக்கப்பட்டுள்ளார்.

செந்தூர்ப்பாண்டியன் புதிய அமைச்சர்

அமைச்சரவையில் புதிதாக கடையநல்லூர் எம்.எல்.ஏ செந்தூர்ப்பாண்டியன் சேர்க்கப்பட்டுள்ளார். இவருக்கு கதர்த்துறை ஒதுக்கப்பட்டுள்ளது. ஜெயலலிதா தலைமையில் அமைச்சரவை அமைந்தபோதே அமைச்சராவார் என்றுஎதிர்பார்க்கப்பட்டவர் செந்தூர்ப்பாண்டியன். ஆனால் அப்போது கிடைக்காத பதவி இப்போது அவருக்குக் கிடைத்துள்ளது.

அமைச்சர்களின் இலாகாக்கள் மாற்றம்

இதுதவிர சில அமைச்சர்களின் இலாகாக்களையும் மாற்றியுள்ளார் முதல்வர் ஜெயலலிதா

இசக்கி சுப்பையா இதுவரை வைத்திருந்த சட்டத்துறை, செய்தி ஒளிபரப்புத் துறை அமைச்சர் செந்தமிழனிடம் கூடுதலாக ஒப்படைக்கப்பட்டுள்ளது.

உணவுத்துறை அமைச்சர் அக்ரி கிருஷ்ணமூர்த்தியின் இலாகா புத்தி சந்திரனிடம் ஒப்படைக்கப்பட்டுள்ளது.

புத்தி சந்திரன் வைத்திருந்த சுற்றுலாத்துறை கோகுல இந்திராவிடம் ஒப்படைக்கப்பட்டுள்ளது.

கோகுல இந்திரா வைத்திருந்த வணிகவரித்துறை அக்ரி கிருஷ்ணமூர்த்தியிடம் ஒப்படைக்கப்பட்டுள்ளது.

இதுவரை கதர்த்துறை அமைச்சராக இருந்து வந்த பி.வி.ரமணா, இனி கைத்தறித்துறை அமைச்சராக செயல்படுவார்.

நாளை பதவியேற்பு

புதிய அமைச்சராக நியமிக்கப்பட்டுள்ள செந்தூர்ப்பாண்டியன் நாளை பதவியேற்கவுள்ளார். அவருக்கு ஆளுநர் பர்னாலா பதவிப்பிரமாணமும், ரகசியக்காப்புப் பிரமாணமும் செய்து வைப்பார் என்று தெரிவிக்கப்பட்டுள்ளது.

செந்தூர்ப்பாண்டியனின் 30 வருட கால அரசியல் பணி:

செங்கோட்டையை சேர்ந்த கடையநல்லூர் எம்எல்ஏ செந்தூர் பாண்டியன் கடந்த 35 ஆண்டுகளாக அதிமுகவில் தீவிரமாக பணியாற்றி நகர துணை செயலாளர், நகர செயலாளர், மாவட்ட துணை செயலாளர், மாவட்ட செயலாளர் உள்பட பல்வேறு பதவிகளில் திறம்பட செயல்பட்டவர்.

கடந்த 7 ஆண்டுகளாக நெல்லை புறநகர் மாவட்ட செயலாளராக செயல்பட்டு வரும் இவர் கடந்த சடடமன்ற தேர்தலில் கடையநல்லூர் தொகுதியில் போட்டியிட்டு எம்எல்ஏவாக தேர்வு செய்யப்பட்டார். அத்துடன் சட்டமன்ற பொது குழு உறுப்பினராகவும் செயல்பட்டு வந்தார்.

இந்நிலையில் செந்தூர்பாண்டியன் நெல்லை ஒருங்கிணைந்த மாவட்ட செயலாளராக தமிழக முதல்வரும், கழக பொது செயலாளருமான ஜெயலலிதா அறிவித்தார். இந்த அறிவிப்பு நெல்லை மாவட்ட அதிமுகவினர் மத்தியில் நல்ல வரவேற்பை பெற்றுள்ளது.

கடந்த 30 ஆண்டுகளாக பல்வேறு பொறுப்பு வகித்து கட்சி தலைமையிலும், தொண்டர்களிடமும் நம்பிக்கை பெற்று திறம்பட பணியாற்றி வரும் செந்தூர்பாண்டியன் கடந்த பார்லிமெண்ட் தேர்தலிலும் தென்காசி தொகுதியில் எம்பி லிங்கம் வெற்றி பெற காரணமாக இருந்து ஜெயலலிதாவின் பாராட்டுதலை பெற்றவர்.

இவருக்கு சண்முகதுரைச்சி என்ற மனைவியும், ஐயப்பராஜ் (சென்னை உயர் நீதிமன்ற கிளையில் வழக்கறிஞராக உள்ளார்), கிருஷ்ணமுரளி என்ற இரண்டு மகன்களும், பிரியதர்ஷினி (டாக்டர்) என்ற மகளும் உள்ளனர்.

செந்தூர்பாண்டியனுக்கு கடையநல்லூர் தொகுதி செயலாளர் பொய்கை மாரியப்பன், நகர செயலாளர்கள் கிட்டு ராஜா, தங்கவேல், ஒன்றிய செயலாளர்கள் வசந்தம் முத்துபாண்டி, செல்லப்பன், சங்கரபாண்டியன், தொகுதி துணை செயலாளர் நடராஜன், முருகன், மாவட்ட கழக துணை செயலாளர்கள் மூர்த்தி, மாநில விவசாய அணி இணை செயலாளர் ஆணை குட்டி பாண்டியன், நகர ஜெ பேரவை செயலாளர்கள் வக்கீல் வெங்கடேசன், மைதீன், நகர துணை செயலாளர் ராஜா, லிங்கம் உள்பட ஏராளமானோர் வாழ்த்து தெரிவித்தனர்.

http://thatstamil.oneindia.in/news/2011/07/03/isakki-sacked-senthoor-pandian-appointed-new-minister-aid0091.html

திருவனந்தபுரம் பத்மநாபசாமி கோவிலில் ரூ. 1 லட்சம் கோடிக்கு நகைக் குவியல்-கோவிலுக்கு பாதுகாப்பு

திருவனந்தபுரம்: திருவனந்தபுரம் பத்மநாபசாமி கோவிலில் இதுவரை ரூ. 1லட்சம் கோடி அளவிலான நகைகள் உள்ளிட்டவை கண்டுபிடிக்கப்பட்டிருப்பதால் பெரும் பரபரப்பு ஏற்பட்டுள்ளது. இதன் மூலம் இந்தியாவிலேயே பணக்கார கோவிலாக கருதப்படும் திருப்பதியை மிஞ்சியுள்ளது பத்மநாபசாமி கோவில்.

திருவனந்தபுரம் பத்மநாபசாமி கோவிலில் 6 பாதாள ரகசிய அறைகள் உள்ளன. திருவிதாங்கூர் சமஸ்தான ராஜ குடும்பத்தினர் வசம் இந்தக் கோவிலின் நிர்வாகம் உள்ளது. இந்த நிலையில் பாதாள அறைகள் பல நூற்றாண்டுகளாக திறக்கப்படாமல் இருப்பதால் அதைத் திறந்து பார்த்து உள்ளே என்ன இருக்கிறது என்பதைக் கண்டறிய வேண்டும் என்று கோரி சுந்தரராஜன் என்பவர் உச்சநீதிமன்றத்தில் வழக்கு தொடர்ந்தார்.

அதை விசாரித்த உச்சநீதிமன்றம், இரு முன்னாள் நீதிபதிகள் அடங்கிய 7 பேர் குழுவை அமைத்து பாதாள அறைகளைத் திறந்து ஆய்வு நடத்த உத்தரவிட்டது. அதன்படி தற்போது ஆய்வு நடந்து வருகிறது.

இதில் பெருமளவிலான நகைக் குவியல் கண்டெடுக்கப்பட்டு அனைவரையும் வியப்படைய வைத்துள்ளது. இதுவரை ரூ. 1 லட்சம் கோடிக்கு மேலான நகைகள் உள்ளிட்டவை கண்டுபிடிக்கப்பட்டுள்ளன. இந்த மதிப்பு மேலும் அதிகரிக்கும் என்றும் கூறப்படுகிறது.

இதன் மூலம் இந்தியாவிலேயே பணக்கார கோவில் என்ற பெயரைக் கொண்ட திருப்பதி கோவிலை மிஞ்சி விட்டது திருவனந்தபுரம் கோவில்.

நேற்று பெருமளவில் தங்க நாணயங்கள், சிலைகள் உள்ளிட்டவை கண்டெடுக்கப்பட்டன.

நேற்று 6வது நாள் நடந்த சோதனையின்போது தங்கத்தாலான விஷ்ணு சிலை, விலை மதிக்கவே முடியாத அரிய வகை வைரங்கள், வைடூரியங்கள் கிடைத்தன. இவற்றின் மதிப்பை அவ்வளவு சீக்கிரம் அளவிட முடியாது என்கிறார்கள். மிகப் பெரிய மதிப்புடையவை இவை என்றும் கூறப்படுகிறது.

தூய தங்கத்தால் ஆன, ஒரு கிலோ எடை கொண்ட 18 அடி நீளமுடைய நகைகளும் நேற்று கண்டுபிடிக்கப்பட்டன. மேலும் பைகள் நிறைய தங்க நாணயங்கள், அரிய வகை கற்கள் ஆகியவையும் கண்டுபிடிக்கப்பட்டன.

இதுவரை கண்டுபிடிக்கப்பட்ட அனைத்துப் பொருட்களின் மதிப்பும் தோராயமாக ரூ. 1 லட்சம் கோடி என்று கூறப்படுகிறது.

மொத்தம் உள்ள ஆறு அறைகளுக்கும் ஏ, பி, சி, டி, இ, எப் என்று பெயரிடப்பட்டுள்ளது. இதில் ஏ அறையில் உள்ளவை குறித்து முழுமையாக சோதனை நடத்தப்பட்டு விட்டது. சி, டி மற்றும் எப் அறைகளில் தொடர்ந்து கண்டுபிடிப்புகள் நடந்து வருகின்றன. பி அறையில் இன்னும் சோதனை நடக்கவில்லை. இந்த அறை 1872ம் ஆண்டுக்குப் பிறகு திறக்கப்படவே இல்லை. அதேபோல இ அறையிலும் சோதனை செய்யப்பட வேண்டியுள்ளது.

ஆய்வு திங்கள்கிழமை முதல் தொடரவுள்ளது. மிகப் பெரிய அளவில் நகைக் குவியலும், அரிய வகை பொருட்களும் கிடைத்துள்ளதால் கோவிலின் பாதுகாப்பு பெரும் கேள்விக்குறியாகியுள்ளது. இதையடுத்து கோவிலுக்கு 3 அடுக்கு பாதுகாப்பு போடப்பட்டுள்ளது. கோவில் பாதுகாப்புப் பொறுப்பு கூடுதல் டிஜிபி வேணுகோபால் நாயரிடம் விடப்பட்டுள்ளது. விரைவில் கோவிலுக்கு மிகப் பெரிய அளவிலான பாதுகாப்புத் திட்டமிடப்படவுள்ளதாக நாயர் தெரிவித்துள்ளார்.

தற்போது கிடைத்துள்ள ரூ. 1 லட்சம் மதிப்பிலா நகைகள், பொருட்கள் யாருடைய பொறுப்பு மற்றும் பாதுகாப்பின் கீழ் வைக்கப்படும் என்பதும் கேள்விக்குறியாகியுள்ளது. கோவில் நிர்வாகம் ராஜ குடும்பத்தினர் வசம் இருப்பதாலும், அரசுக்கு இதுவரை இந்தக் கோவில் தொடர்பாக எந்த உரிமையும் இல்லாததாலும் இது மிகப் பெரிய கேள்விகளை எழுப்பியுள்ளது.

கோவிலை அரசே ஏற்க உத்தரவிடக் கோரி அரசு சார்பில் ஏற்கனவே வழக்கு நிலுவையில் உள்ளது. எனவே அந்த வழக்கில் கிடைக்கும் தீர்ப்பைப் பொறுத்துதான் கோவிலில் உள்ள நகை உள்ளிட்ட அரிய வகை பொருட்கள் யாருடைய பொறுப்பின் கீழ் வரும் என்பது தெரிய வரும்.

மேலும் வரலாறு காணாத வகையில் மிகப் பெரிய மதிப்பிலான நகைகள் மற்றும் பொருட்களை தொடர்ந்து கோவிலிலேயே வைத்துப் பராமரிப்பது என்பது பாதுகாப்புக்கு உரியதல்ல என்பதால் தற்போது கண்டுபிடிக்கப்பட்டுள்ள பொருட்கள் எங்கு வைக்கப்படவுள்ளது என்ற கேள்வியும் எழுந்துள்ளது.
http://thatstamil.oneindia.in/news/2011/07/03/1-lakh-cr-counting-treasur-hunt-padmanabhaswamy-temple-aid0091.html

கட்சி அமைப்பை மாற்றி அமைப்பதோடு, நீண்ட காலமாக ஒரே பதவியிலிருப்போரை மாற்ற தி.மு.க., தலைமை முடிவு செய்துள்ளது. இது, மாவட்டச் செயலர்கள் இடையே கடும் அதிர்ச்சியை ஏற்படுத்தியுள்ளது.

குக்கிராமங்களிலும் கிளைகளைக் கொண்டது தி.மு.க., இக்கட்சியில், மாநில அளவில் கட்சித் தலைவருக்கு முதலிடம். அடுத்து பொதுச் செயலர், பொருளாளர் உட்பட மற்ற நிர்வாகிகள் உள்ளனர். மாவட்ட அளவில், மாவட்டச் செயலருக்கு முதலிடம். அடுத்த நிலையில் மற்ற நிர்வாகிகள் வருவர். அதேபோல் ஒன்றிய, நகர நிர்வாகிகள் தேர்ந்தெடுக்கப்படுகின்றனர். இவை தவிர, இலக்கிய அணி, வழக்கறிஞர் அணி, மகளிர் அணி, இளைஞர் அணி என பல அணிகள் உள்ளன. பல அணிகள் இருந்தாலும், கட்சி அளவில் மாவட்டச் செயலர்களே அதிகாரம் மிகுந்தவர்களாக உள்ளனர். சட்டசபை தேர்தல், உள்ளாட்சி தேர்தல், என அனைத்திலும், மாவட்டச் செயலர் ஆதரவு பெற்றவர்களுக்கே வாய்ப்பு வழங்கப்படுகிறது. அவர்களை மீறி செயல்படுவோர், கட்சியில் நீடிப்பது சிரமம். பல மாவட்டச் செயலர்கள், கருணாநிதியின் துவக்க காலத்திலிருந்தே உடனிருந்து கட்சிக்கு சோதனைகள் ஏற்பட்டபோது, தோள் கொடுத்தவர்கள். எனவே, அவர்கள் மீது குற்றச்சாட்டுகள் எழுந்தாலும், தலைமையால் நடவடிக்கை எடுக்க முடியவில்லை.

சேலம், தூத்துக்குடி, விழுப்புரம், வேலூர், திருநெல்வேலி, என பல மாவட்டங்களில், மாவட்டச் செயலர் பதவி ஒருவரிடமே நிரந்தரமாக உள்ளது. அவர்களின் நடவடிக்கையால் பாதிக்கப்பட்டோர், தனி கோஷ்டியாக செயல்படுவதால், கட்சியில் பூசல் அதிகரித்துள்ளது.கடந்த 2001ம் ஆண்டு சட்டசபை தேர்தலில் தி.மு.க., தோல்வி அடைந்தது. தோல்விக்கு மாவட்டச் செயலர்கள் மீது குற்றம் சுமத்தப்பட்டது. அதைத் தொடர்ந்து, மாவட்டச் செயலர்களின் அதிகாரத்தை குறைக்க, மண்டலச் செயலர்கள் நியமிக்கப்பட்டனர். மீண்டும் 2006ம் ஆண்டு ஆட்சிக்கு வந்ததும், மாவட்டச் செயலர்கள் அதிகாரத்துடன் வலம் வரத் துவங்கினர். மண்டலச் செயலர் பதவி இருப்பதே தெரியாத நிலை ஏற்பட்டது.சமீபத்தில் நடந்த சட்டசபை தேர்தலில் தி.மு.க., தோல்வியைத் தழுவியது. தோல்விக்கு பொறுப்பேற்று, ஒரு மாவட்டச் செயலர் கூட, பதவியை ராஜினாமா செய்ய முன் வரவில்லை.

குறுநில மன்னர்கள் போல் செயல்பட்ட, மாவட்டச் செயலர்களால்தான் தோல்வியை சந்திக்க நேரிட்டது, எனத் தொண்டர்கள் கட்சி தலைமையிடம் முறையிட்டனர்.அவர்களின் கருத்துக்களுக்கு மதிப்பளித்து, மாவட்டச் செயலர்களின் அதிகாரத்தை குறைக்க, மாவட்டக்கழக அமைப்பை கலைப்பது, அதற்கு பதிலாக, லோக்சபா தொகுதி, சட்டசபை தொகுதி வாரியாக குழுக்கள் அமைப்பது, என தி.மு.க., முடிவு செய்துள்ளது. இது தொடர்பாக, தலைமை பொதுக்குழு உறுப்பினர்கள் வரும் 15ம் தேதிக்குள், தங்கள் கருத்துக்களை கட்சி தலைமைக்கு அனுப்ப வேண்டும், என தலைமைக் கழகம் அறிவித்துள்ளது.கட்சி அமைப்பை மாற்றுவதன் மூலம், வயதான நிர்வாகிகளைப் பதவியிலிருந்து கழற்றி விட கட்சி முடிவு செய்துள்ளது.

இதை வெளிப்படுத்தும் விதமாக, திருவள்ளூர் மாவட்டம் பெரியபாளையத்தில் நடந்த தி.மு.க., கூட்டத்தில், முன்னாள் அமைச்சர் துரைமுருகன் பேசும்போது, ""கட்சியில் வயதானவர்கள், இளைஞர்களுக்கு வழிவிட வேண்டும். எல்லா மட்டத்திலும் இதை அமல்படுத்த வேண்டும். அப்போது தான் கட்சி வளரும். இல்லையெனில், கட்டிக்காத்த இயக்கம் கண்ணெதிரிலே உருக்குலையும் அபாயம் உள்ளது,'' என்றார்.

மாவட்ட பொதுக்குழு உறுப்பினர்களில் பெரும்பாலானோர், தற்போதுள்ள மாவட்டச் செயலர்களால் பாதிக்கப்பட்டவர்கள். எனவே, கட்சி தலைமையின் முடிவிற்கு ஆதரவு அதிகமாகவே இருக்கும் என எதிர்பார்க்கப்படுகிறது. ஆனால், மாவட்டச் செயலர்கள் அதிர்ச்சியில் உள்ளனர்.

இது குறித்து கட்சி நிர்வாகிகள் சிலர் கூறியதாவது:கட்சி தலைமை, மாவட்ட அமைப்பை கலைக்க முடிவு செய்துவிட்டது. பெயரளவிற்கே கருத்து கேட்கிறது. மாவட்ட அமைப்பை கலைத்தாலும், லோக்சபா தொகுதி தலைமைப் பதவிக்கு, பெரும்பாலான மாவட்டச் செயலர்கள் வந்து விடுவர். சில மாவட்டங்களில் இரண்டு மாவட்டச் செயலர்கள் செயல்படும் நிலை உருவாகும். அவர்களுக்குள் ஈகோ தலை தூக்கினால், கோஷ்டி பூசல் அதிகரிக்கும். மாவட்ட அமைப்பை மட்டும் கலைக்க முடிவு செய்திருப்பதாக, கட்சி தலைமை அறிவித்துள்ளது. லோக்சபா தொகுதி, சட்டசபை தொகுதி குழுக்கள் எவ்வாறு அமைக்கப்படும், ஒன்றிய, நகர, கிளை அமைப்புகள் மாற்றப்படுமா என்ற விவரம் தெரியவில்லை. கோவையில் ஜூலை 23 மற்றும் 24ம் தேதி பொதுக்குழுக் கூட்டம் நடைபெறுகிறது. அப்போதுதான் முழு விவரம் தெரிய வரும். அதுவரை கட்சியினரிடம் குழப்பமே நீடிக்கும்.இவ்வாறு நிர்வாகிகள் தெரிவித்தனர்.

http://www.dinamalar.com/News_Detail.asp?Id=268410

சனல் 4 காணொலியின் மூலப்பிரதி விவகாரம் – குழம்பிப் போயுள்ள சிறிலங்கா இராணுவப் பேச்சாளர்

சனல்-4 தொலைக்காட்சியில் வெளியிடப்பட்ட போர்க்குற்ற காணொலியின் மூலப்பிரதி என்று கூறப்பட்டு நேற்று சுவர்ணவாகினி தொலைக்காட்சியில் ஒளிபரப்பப்பட்ட காணொலிப் பதிவு குறித்து சிறிலங்கா இராணுவப் பேச்சாளர் மேஜர் ஜெனரல் உபய மெடவெல குழப்பமான தகவல்களை வெளியிட்டுள்ளார்.

இதுவே மூலப்பிரதி என்றும் அதை பிரித்தானியாவில் இருந்து பெற்றுக் கொண்டதாகவும் அவர் நேற்றிரவு கூறியிருந்தார்.

ஆனால் இன்று அவர், இந்தக் காணொலி எங்கிருந்து பெறப்பட்டது என்பது குறித்து இன்னமும் உறுதி செய்யப்படவில்லை என்று தெரிவித்துள்ளார்.

அதேவேளை, சிறிலங்கா பாதுகாப்பு அமைச்சின் ஊடாகவே இந்தக் காணொலி சுவர்ணவாகினியில் நேற்று ஒளிபரப்புச் செய்யப்பட்டிருந்தது.

இந்தநிலையில் இன்று இந்தக் காணொலியை சுவர்ணவாகினியிடம் இருந்து மேலதிக விசாரணைகளுக்காக சிறிலங்கா பாதுகாப்பு அமைச்சு பெற்றுக் கொண்டுள்ளதாகவும், அது ஆராயப்பட்டு வருவதாகவும் இராணுவப் பேச்சாளர் மேஜர் ஜெனரல் உபய மெடவெல குறிப்பிட்டுள்ளார்.

சிறிலங்கா இராணுவப் பேச்சாளரின் முன்னுக்குப் பின் முரணான இந்தக் கருத்துக்கள் கொழும்பு ஊடக வட்டாரங்களில் பலத்த சந்தேகங்களைக் கிளப்பியுள்ளது.

http://www.puthinappalakai.com/view.php?20110702104191

புத்தர் வந்தார்; வெள்ளரசும் வந்தது – காணாமற் போகப்போகும் கனகராயன்குளம்

கனகராயன்குளத்தை பௌத்த மயப்படுத்தும் நடவடிக்கைளில் சிறிலங்கா இராணுவம் ஈடுபட்டுள்ளது.

பாரம்பரிய தமிழ்க் கிராமமான கனகராயன்குளத்தில் சிறி சம்புத்த ரஜமகா விகாரை என்ற பெயரில் பாரிய பௌத்த விகாரை ஒன்று கட்டப்படவுள்ளது.

இங்கு சிறியளவிலான புத்தர்சிலை ஒன்று வைக்கப்பட்டு வழிபாடு நடத்தப்பட்டு வரும் நிலையில்- அடுத்த கட்டமாக விகாரை அமைக்கப்படவுள்ள இடத்தில் அரச மரக்கன்று ஒன்றை நாட்டும் பௌத்த சமய நிகழ்வுகள் கடந்த திங்கட்கிழமை நடத்தப்பட்டுள்ளன.

கனகராயன்குளத்தில் அமையவுள்ள சிறி சம்புத்த ரஜமகா விகாரையின் விகாராதிபதியாக நியமிக்கப்பட்டுள்ள வண.எட்டம்பகஸ்கட கல்யாணதிஸ்ஸ நாயக்க தேரர் அனுராதபுர புனித வெள்ளரச மரத்தின் கிளையொன்றை கொண்டு இங்கு வந்துள்ளார்.

வன்னிப் படைகளின் தளபதி மேஜர் ஜெனரல் சுமேத பெரேரா, அந்த அரசமரக் கன்றை விகாராதிபதியிடம் இருந்து பெற்று அதனை விகாரைப் பகுதியில் நாட்டியுள்ளார்.

சிங்கள பௌத்த பாரம்பரிய வாத்தியங்கள் முழங்க சுபநேரத்தில் இந்த அரச மரக்கன்று நாட்டும் நிகழ்வு இடம்பெற்றுள்ளது.

இந்த நிகழ்வில் சிறிலங்கா இராணுவத்தின் 56வது டிவிசன் கட்டளை அதிகாரி பிரிகேடியர் பிரியந்த நாபாகொட, 56-1 பிரிகேட் தளபதி பிரிகேடியர் ரணவக்க, மற்றும் படை அதிகாரிகயுளும் கலந்து கொண்டனர்.

அத்துடன் அயல் கிராமங்களில் வாழும் தமிழ்மக்களையும் சிறிலங்காப் படையினர் கட்டாயமாக இந்த நிகழ்வுக்கு அழைத்து வந்திருந்தனர்.

கனகராயன்குளத்தில் புதிய விகாரையை அமைக்கும் நடவடிக்கைகளில் ஈடுபட்டுள்ள சிறிலங்காப் படையினர் அங்கு முன்னர் ஒரு பௌத்த விகாரை இருந்ததாக வரலாற்றைத் திரிபுபடுத்தவும் முயன்றுள்ளனர்.

வரலாற்றுச் சிறப்புமிக்க சிறி சம்புத்த ரஜமகா விகாரை இங்கு அமைந்திருந்ததாக சிறிலங்காப் படையினர் கூறியுள்ளனர்.

அத்துடன் முன்னர் இந்த விகாரையில் இருந்த பிக்குகள் புலிகளின் தீவிரவாதம் உச்சமடைந்திருந்த போது அங்கிருந்து வெளியேறி விட்ட நிலையில்- அங்கிருந்த பழைய அரசமரம் தானாகவே இறந்து போய் விட்டதாகவும் கட்டுக்கதை ஒன்றை சிறிலங்கா இராணுவம் அவிழ்த்து விட்டுள்ளது

கனகராயன்குளத்தில் எந்தவொரு காலத்திலும் பௌத்த விகாரை இருக்கவில்லை என்பதும், சிறிலங்கா அரசின் திட்டமிட்ட பௌத்த மயமாக்கல் நடவடிக்கையை மறைப்பதற்காகக் கூறப்படும் கட்டுக்கதையே இது என்பதும் குறிப்பிடத்தக்கது.

http://www.puthinappalakai.com/view.php?20110702104190

நான்.. இனி செல்லாக் காசு!

சிறு பிள்ளைகளின் உள்ளங்கையில் கூட, அடம்பிடிக்காமல் உட்கார்ந்து கொள்ளும் தன்னடக்கம் மிக்கவன் நான். கீழே விழுந்தால் கூட ஓங்கி ஒலிக்காமல், மெல்ல சிணுங்குவேன். அன்று...ஆடவரின் சட்டைப் பைக்குள் நான் இருந்தால், அவர்கள் மகாராஜா. குட்டி குட்டி வட்டமாய், சுற்றி சுற்றி வந்த என்னை பெருமைமிக்க இந்திய அரசு இன்று, செல்லாக் காசாக்கி விட்டது.
ஆம்...நான் தான் 25 காசு பேசுகிறேன்... இன்னமும் உங்கள் வீட்டில் நான் இருக்கிறேன். உங்களிடமிருந்து விடைபெறும் முன், என்னைப் பற்றி, நான் வாழ்ந்த காலத்தைப் பற்றி கூறுகிறேன்...படிக்கிறீங்களா?பிரிட்டீஷார் என் மதிப்பறிந்து, ஏக மரியாதை செய்தனர். அது ஒரு கனாக்காலம். ஒரு நாள் முழுக்க வயலில் வேலை செய்தால், என்னையே கூலியாக தந்தனர். அந்தக் கூலியில் ஒருவாரத்திற்கு தேவையான காய்கறி, அரிசி, பலசரக்கு பொருட்களை வாங்க உதவினேன். மற்றவர்களைப் போல வெறும் இரும்பல்ல, நான். நிக்கலும், வெள்ளியும் கலந்த கலவை. விலைமதிப்புள்ளவன். கோயில்களில் பக்தர்கள் காணிக்கையாக என்னை உண்டியலில் இடும் போதெல்லாம் நான் சந்தோஷப்பட்டேன். இறைவனுக்காக என்னை அர்ப்பணிக்கின்றனரே என்று. வெள்ளியால் ஆன என்னை மட்டும் தனியாக பிரித்து, பொருட்கள் செய்ய பயன்படுத்திக் கொண்டனர். அந்தளவிற்கு பெருமையானவாக இருந்தேனே...

வியாபாரிகளிடம் அதிகளவில் சேரும் என் இனத்தவரை, வங்கியில் மூட்டையாக கொண்டு போய் தான் சேர்த்தனர். வங்கியாளர்களும் முகம் சுளிக்காமல், எங்களை எண்ணி மதிப்பிட்டனர். அப்போதெல்லாம் வெற்று காகிதத்திற்கு (ரூபாய்) அதிகம் பெருமையில்லை. 1956 ல் ஒரு பவுன் தங்கத்தின் விலையே 63 ரூபாய் தான். என்னை விலையாக கொடுத்து, தியேட்டரில் சொகுசான "பாக்ஸ்' இருக்கையில் அமர்ந்து சினிமாவை ரசித்தனர். டவுன் பஸ்சில் "25 காசு டிக்கெட்'...உங்களுக்கு ஞாபகமில்லையா? என்னை தந்தால், ஒரு "சென்ட்' பாட்டில், சீருடை தைக்க பயன்படும் ஒரு கஜம் காடாத்துணி, 60 பக்க நோட்டு வாங்கலாம்.
எந்த ஒரு நல்ல காரியம் என்றாலும், ஒரு ரூபாயுடன் என்னையும் சேர்த்து, "ஒன்ணேகால் ரூபாயை குலதெய்வத்திற்கு முடிஞ்சு போடுங்க' என்றுக்கூறி, எனக்கு பெருமை சேர்த்தனர். முன்பெல்லாம், இறந்தவர்களின் நெற்றியில் என்னை வைத்த காலமும் உண்டு. அது போய் பல வருஷம் ஆச்சு..எனக்கு மதிப்பு குறைய ஆரம்பிச்ச பிறகு நெற்றியில என் இடத்த அண்ணன் ஒரு ரூவா பிடிச்சிடுச்சு. அந்த காலத்தில் என்னை வெள்ளி காசாக உருவாக்கி, மதிப்பு கொடுத்தனர்.

1931க்கு பின், பித்தளை, இரும்பு, குரோமியம் கலந்த காசாக மாற்றி, எனது மதிப்பை குறைத்தனர். அப்போது எனக்கு "நாலணா' என்று பெயர். அரைபடி பொறிக்கடலை, அச்சுவெல்லம் வாங்கும் அளவிற்கு எனக்கு மதிப்பு இருந்தது. அப்போது எல்லாம் என்னை ஓட்டலில் தந்தால் திருப்தியாக வயிராற சாப்பிடலாம். அப்படி சாப்பிட்டவர்கள்... இவ்வுலகைவிட்டு விடைபெற்றுவிட, நான் மட்டும் விதிவிலக்கா என்ன?எல்லோரும் ஏற்றி விட்ட விலைவாசியால்... இங்கு இனி என்னை தந்தால் என்ன கிடைக்கும்? எனவே நான் நிரந்தரமாக முடக்கப்பட்டு விட்டேன். இனி, எங்கோ ஓர் மூலையில் அருங்காட்சியகத்தில் மட்டுமே என்னை காணமுடியும். இனி உங்களை பொறுத்தவரை, நான் ஒரு செல்லாக் காசு
http://www.dinamalar.com/News_Detail.asp?Id=267941

தமிழினப் படுகொலை செய்த இலங்கை ராணுவத்திற்கு இந்தியா பயிற்சி: சீமான் கண்டனம்

சென்னை: இலங்கை ராணுவத்தினருக்கு இந்தியாவின் ராணுவ பயிற்சிக் கழகங்களில் திறன் மேம்பாட்டுப் பயிற்சி அளிப்பது என்று ஒப்புக்கொள்ளப்பட்டதற்கு நாம் தமிழர் கட்சியின் தலைவர் சீமான் கண்டனம் தெரிவித்துள்ளார்.

இது குறித்து அவர் வெளியிட்டுள்ள அறிக்கையில் கூறியிருப்பதாவது,

இலங்கை ராணுவப் படையினருக்கும், அதிகாரிகளுக்கும் இந்தியாவின் ராணுவ பயிற்சிக் கழகங்களில் திறன் மேம்பாட்டுப் பயிற்சி அளிக்க அதிக இடங்களை ஒதுக்கவும், தீவிரவாதத்திற்கு எதிரான சிறப்புப் பயிற்சி அளிக்கவும் இந்திய ராணுவம் ஒப்புக்கொண்டுள்ளது மனிதாபிமானமற்ற, தமிழர் விரோத நடவடிக்கையாகும். இதனை நாம் தமிழர் கட்சி வன்மையாகக் கண்டிக்கிறது.

இலங்கை ராணுவ செயலர் மேஜர் ஜெனரல் எச்.சி.பி. குணதிலக்கே தலைமையிலான குழுவுடன் இந்திய ராணுவத்தின் பன்னாட்டு ஒத்துழைப்பு பிரிவிற்கான கூடுதலை தலைமை இயக்குனர் மேஜர் ஜெனரல் ஐ.பி.சிங் தலைமையிலான குழு டெல்லியில் நேற்று நடத்திய பேச்சுவார்த்தையில் இவ்வாறு ஒப்புக்கொள்ளப்பட்டுள்ளதென இந்திய ராணுவ அதிகாரி கூறியுள்ளதாக செய்திகள் தெரிவிக்கின்றன.

இலங்கையில் தமிழர்களுக்கு எதிராக அந்நாட்டு அரசு நடத்திய இனப் படுகொலைப் போர் குறித்து முழுமையான விசாரணை நடத்த வேண்டும் என்று ஐ.நா. நிபுணர் குழு அளித்த அறிக்கையின் அடிப்படையில் இலங்கை அரசுக்கு எதிராக உலக நாடுகள் கடும் அழுத்தம் கொடுத்துவருகின்றன.

தமிழர்களை இனப் படுகொலை செய்த இலங்கை அரசை போர்க் குற்றவாளியாக அறிவிக்க வேண்டும் என்றும், அந்நாட்டிற்கு எதிராக பொருளாதாரத் தடை விதிக்க உலக நாடுகளுடன் இணைந்து இந்திய அரசு நடவடிக்கை மேற்கொள்ள வேண்டும் என்றும் தமிழக சட்டசபையில் ஒருமனதாக தீர்மானங்கள் நிறைவேற்றப்பட்டுள்ளது.

இந்நிலையில் அதற்கு நேர் மாறாக, தமிழினப் படுகொலை செய்த இலங்கை ராணுவத்திற்கு திறன் மேம்பாட்டுப் பயிற்சியளிக்கப்படும் என்று இந்திய ராணுவம் அறிவித்துள்ளது. இந்த அறிவிப்பு இலங்கைத் தமிழர்களுக்கு எதிராக அந்நாட்டு அரசு நடத்திய இனப் படுகொலையை ஆதரிக்கிறது என்பது மட்டுமின்றி தமிழர்களின் குரலாக எதிரொலித்த தமிழக சட்டசபையின் தீர்மானத்தையும் அவமதிப்பது ஆகும்.

இந்திய ராணுவத்தின் இம்முடிவு, அது தமிழினப் படுகொலையில் இலங்கை ராணுவத்திற்கு முழுமையாக உதவியுள்ளது என்பதற்கு மேலும் ஒரு அத்தாட்சியாகும்.

இலங்கை ராணுவத்தின், அந்நாட்டு அரசின் மனிதாபிமான முகம்தான் இன்றைக்கு உலகெங்கிலும் கண்டனத்திற்குரியதாக உள்ளது. ஐ.நா. அமைதிப் படையின் அங்கமாக ஹைட்டி நாட்டிற்குச் சென்ற இலங்கை ராணுவத்தினர், அந்நாட்டின் சிறுமிகளை பாலியல் வன்முறை செய்துள்ளனர் என்று குற்றம்சாற்றப்பட்டு விசாரணை நடந்து வருகிறது. ஆனால் இந்தியாவின் ராணுவமோ அந்நாட்டிற்கு மனிதாபிமான நடவடிக்கைகள் பற்றிக் கற்றுத் தரப்போகிறேன் என்கிறது. இதைவிடக் கேலிக் கூத்தும், கொடூரமும் வேறு என்ன இருக்க முடியும்?

பன்னாட்டு மனிதாபிமானப் பிரகடனங்களில் கையெழுத்திட்டுள்ள நாடான இந்தியாவின் ராணுவம், அந்தப் பிரகடனங்களின்படி குற்றமிழைத்துள்ளதாக ஐ.நா. நிபுணர் குழுவால் குற்றம்சாட்டப்பட்டுள்ள நாட்டிற்கு ராணுவ பயிற்சி அளிக்க முன்வந்திருப்பது, மனிதாபிமான பிரகடனங்களை அவமதிப்பது ஆகும்.

இந்திய இராணுவத்தின் இந்த நடவடிக்கை இலங்கைத் தொடர்பான இந்திய அரசின் தவறான போக்கு தடையற்று தொடருவதையே காட்டுகிறது. இதனை தமிழர்களும், தமிழக அரசும் புரிந்துகொள்ள வேண்டும். ஈழத் தமிழர் பிரச்சனையில் இந்திய அரசின் போக்கு நியாயமற்றதாகவே எதிர்காலத்திலும் இருக்கும் என்பதற்கு இந்திய ராணுவத்தின் இந்த முடிவு ஒரு அறிகுறியாகும் என்று அதில் அவர் தெரிவித்துள்ளார்.

http://thatstamil.oneindia.in/news/2011/07/02/seeman-condemns-indian-military-decision-aid0128.html

சாதி்க்பாட்ஷா மரணத்திற்கும், எங்களுக்கும் தொடர்பில்லை: திமுக அறிவிப்பு

சென்னை: ஆ.ராசாவின் நெருங்கிய நண்பர் சாதி்க் பாட்ஷாவின் தற்கொலைக்கும், எங்களுக்கும் சம்பந்தம் இல்லை என்று திமுக தெரிவித்துள்ளது.

முன்னாள் தொலைதொடர்புத் துறை அமைச்சர் ஆ. ராசாவின் நெருங்கிய நண்பர் சாதிக் பாட்ஷா சென்னை தேனாம்பேட்டையில் உள்ள தனது வீட்டில் கடந்த மார்ச் 16-ம் தேதி தூக்கில் தொங்கிய நிலையில் பிணமாகக் கண்டெடுக்கப்பட்டார். 2ஜி வழக்கு தொடர்பாக அவரிடம் நடத்தப்பட்ட சிபிஐ விசாரணையால் மன உளைச்சலில் தவித்து வந்த அவர் தற்கொலை செய்து கொண்டதாக அவரது மனைவி மற்றும் உறவினர்கள் கூறினர்.

ஆனால் சம்பவம் நடந்து பல மணி நேரத்திற்குப் பிறகுதான் பாட்ஷாவின் மரணம் குறித்த தகவல் வெளியானதால் அதுகுறித்து பல்வேறு சந்தேகங்கள் எழுந்தன. அப்போது திமுக ஆட்சியில் இருந்தது. பாட்ஷா மரணம் குறித்து பல்வேறு கேள்விகள் எழுந்ததால் வழக்கை சிபிஐ வசம் ஒப்படைத்தது திமுக அரசு. இந்நிலையில் பாட்ஷா கொலை செய்யப்பட்டிருக்கலாம் என்று சிபிஐ கருதுகிறது.

இதையடுத்து ஒரு டாக்டர்கள் குழுவை அமைத்து சாதிக் பாட்சாவின் பிரேதப் பரிசோதனை அறிக்கையை மீண்டும் ஆய்வு செய்யுமாறு அகில இந்திய மருத்துவக் கவுன்சிலிடம் கோர சிபிஐ முடிவு செய்துள்ளது.

இந்நிலையில் சாதிக் பாட்ஷாவின் மரணத்திற்கும், தங்களுக்கும் எந்தவித சம்பந்தமும் இல்லை என்று இன்று திமுக தெரிவித்துள்ளது. இது குறித்து எந்த விசாரணையையும் சந்தி்க்கத் தயார் என்றும் அது தெரிவித்துள்ளது.

ஏற்கனவே பல சிக்கல்களில் சிக்கித் தவிக்கும் திமுகவுக்கு சாதிக் பாட்ஷாவின் மரண வழக்கும் ஒரு தலைவலியாக உள்ளது.
http://thatstamil.oneindia.in/news/2011/07/02/sadiq-batcha-suicide-dmk-no-connection-aid0128.html

வடிவேல் மீதான விஜயகாந்த் மேலாளர் தொடர்ந்த வழக்கு-தள்ளி வைப்பு

சென்னை: விஜயகாந்தின் மேலாளர் தொடர்ந்த நடிகர் வடிவேல் மீதான அடிதடி வழக்கின் இறுதி விசாரணையை சென்னை உயர்நீதிமன்றம் தள்ளி வைத்துள்ளது.

சென்னை சாலிகிராமத்தில் வசித்து வந்தவர் வக்கீல் முத்துராம். இவர், தே.மு.தி.க. தலைவர் விஜயகாந்தின் மைத்துனர். இவர் 12.9.07 அன்று மரணமடைந்தார். எனவே இறுதி அஞ்சலிக்காக பலர் அவரது வீட்டுக்கு வந்திருந்தனர். அங்கு அதிக கூட்டமாக இருந்ததால், அதே பகுதியில் வசித்து வந்த நகைச்சுவை நடிகர் வடிவேல் தனது அலுவலகத்துக்கு செல்வதில் இடையூறு ஏற்பட்டது.

இதனால் வடிவேலுவுக்கும், இறுதி அஞ்சலிக்கு வந்த சிலருக்கும் இடையே வாய்த் தகராறு ஏற்பட்டது. பின்னர் வடிவேல் வீட்டுக்குச் சென்றுவிட்டார். மீண்டும் வடிவேல் 20 பேரை அழைத்து வந்து விஜயகாந்தின் மேலாளர் சதீஷ்குமாருடன் தகராறு செய்ததாகக் கூறப்படுகிறது. அப்போது சதீஷ்குமாருக்கு காயம் ஏற்பட்டது.

இதுகுறித்து விருகம்பாக்கம் போலீசில் சதீஷ்குமார் புகார் கொடுத்தார். இந்த புகாரின் அடிப்படையில் வடிவேல் உட்பட 20 பேர் மீது போலீசார் வழக்குப் பதிவு செய்தனர்.

பதிலுக்கு தன் வீட்டு மீது கல்லெறிந்து, குடும்பத்தினரை காயப்படுத்தியதாக வடிவேல் கொடுத்த புகாரின் அடிப்படையில் சதீஷ்குமார் உட்பட 8 பேர் மீது விருகம்பாக்கம் போலீசார் வழக்குப் பதிவு செய்தனர்.

இந்த நிலையில் வடிவேல் மீது பதிவு செய்யப்பட்ட வழக்கை விருகம்பாக்கம் போலீசார் கைவிட்டனர். அந்த வழக்கை ரத்து செய்து மாஜிஸ்திரேட்டு உத்தரவிட்டார். சதீஷ்குமார் மீதான வழக்கு சைதாப்பேட்டை மாஜிஸ்திரேட்டு கோர்ட்டில் விசாரிக்கப்பட்டு வருகிறது.

வடிவேலுவின் வக்கீல் வரவில்லை

இந்த நிலையில் மாஜிஸ்திரேட்டு உத்தரவை ரத்து செய்து, தனது புகாரை வேறொரு இன்ஸ்பெக்டர் விசாரிக்க உத்தரவிட வேண்டும் என்று உயர்நீதிமன்றத்தில் சதீஷ்குமார் மனு தாக்கல் செய்தார். இந்த மனு, நீதிபதி கே.என்.பாஷா முன்னிலையில் இறுதி விசாரணைக்கு வந்தது.

சதீஷ்குமார் தரப்பில் வக்கீல்கள் நமோ நாராயணன், பெரியசாமி ஆகியோர் ஆஜரானார்கள். ஆனால் வடிவேல் தரப்பில் வக்கீல்கள் யாரும் ஆஜராகவில்லை. எனவே வழக்கின் இறுதி விசாரணையை அடுத்த வாரத்துக்கு நீதிபதி தள்ளி வைத்தார்.

http://thatstamil.oneindia.in/movies/news/2011/07/02-case-against-vadivelu-postponed-aid0136.html

ஜூலை 4ம் தேதி தெலுங்கானா காங்கிரஸ் எம்.எல்.ஏக்கள், எம்.பிக்கள், எம்.எல்.சிக்கள் கூண்டோடு ராஜினாமா

ஹைதராபாத்: ஆந்திராவில் தெலுங்கானா விவகாரம் மீண்டும் சூடு பிடிக்க ஆரம்பித்துள்ளது. தெலுங்கானா பகுதியைச் சேர்ந்த காங்கிரஸ் கட்சியைச் சேர்ந்த எம்.எல்.ஏக்கள், எம்.எல்.சிக்கள், எம்.பிக்கள் கூண்டோடு ராஜினாமா செய்ய தீர்மானித்துள்ளனர். இதனால் காங்கிரஸ் கட்சிக்கும், ஆந்திர ஆட்சிக்கும் பெரும் நெருக்கடி ஏற்பட்டுள்ளது.

கிரண் ரெட்டி அமைச்சரவையில் உள்ள அமைச்சர்களும் இதில் அடக்கம் என்பதால் காங்கிரஸ் கட்சி வட்டாரம் பரபரப்பில் மூழ்கியுள்ளது. ஜூலை 4ம் தேதி தாங்கள் ராஜினாமா செய்யப் போவதாக அவர்கள் கூறியுள்ளனர்.

இதுகுறித்து தெலுங்கானாவைச் சேர்ந்தவரும், ஆந்திர மாநில பஞ்சாயத்து ராஜ் அமைச்சருமான ஜனா ரெட்டி கூறுகையில், தெலுங்கானா தனி மாநில கோரிக்கைக்காக நாங்கள் விலக வேண்டும் என மக்கள் எதிர்பார்க்கின்றனர். தெலுங்கானாவை நிர்மானிக்க தாமதம் ஆவதால், நாங்கள் எல்லாம் ஏதோ பதவிக்காக ஒட்டிக் கொண்டிருப்பதாக மக்கள் தவறாக கருதும் நிலை ஏற்பட்டு விட்டது.

எங்களுக்குப் பதவி தேவையில்லை. மக்களின் உணர்வுகளைத்தான் நாங்கள் மதிக்கிறோம். எனவேதான் ஜூலை 4ம் தேதி அத்தனை பேரும் ராஜினாமா செய்ய தீர்மானித்துள்ளோம்.

எம்.பிக்கள் லோக்சபா சபாநாயகருக்கும், எம்.எல்.ஏக்கள் சட்டசபை சபாநாயகருக்கும், மேலவை உறுப்பினர்கள் மேலவைத் தலைவரிடமும் தங்களது ராஜினாமா கடிதங்களை அனுப்பி வைப்பார்கள் என்றார் ஜனா ரெட்டி.

இதற்கிடையே, ஹைதராபாத் வந்துள்ள குலாம் நபி ஆசாத், தெலுங்கானாவைச் சேர்ந்த காங்கிரஸார் அவசரப்படக் கூடாது என்று கூறியுள்ளார். அவர் கூறுகையில், ஒரு தனி மாநிலத்தை உருவாக்குவது என்பது எளிதான காரியமல்ல. இதைப் பார்த்து நாளை மற்ற மாநிலங்களிலும் பிரச்சினை தலை தூக்கும் என்பதால் இதில் அவசரம் காட்ட முடியாது. காங்கிரஸ் எம்.பிக்கள், எம்.எல்.ஏக்கள், எம்.எல்.சிக்கள் தங்களது முடிவை வாபஸ் பெற வேண்டும் என்றார்.
http://thatstamil.oneindia.in/news/2011/07/02/congress-lawmakers-from-telangana-resign-masse-aid0091.html

அரசு கேபிள் டிவி ஜெயலலிதா வசம் உள்ள உள்துறைக்கு மாற்றம்: 3 மாதத்தில் துவக்கம்

சென்னை: அரசு கேபிள் டிவியை செயல்படுத்துவதின் முதல்கட்டமாக கேபிள் டிவி நிறுவனத்தை தன் கட்டுப்பாடில் இயங்கும் உள்துறைக்கு மாற்றியுள்ளார் முதல்வர் ஜெயலலிதா. இதையடுத்து அரசு கேபிள் டிவி பக்காவாக செயல்படும் என்ற நம்பிக்கை எழுந்துள்ளது.

அரசு கேபிள் டிவியை இன்னும் 3 மாத காலத்தி்ற்குள் செயல்படுத்த தமிழக முதல்வர் ஜெயலலிதா முனைப்பாக உள்ளார். இதன் முதல் கட்டமாக தகவல் தொழில்நுட்பத் துறையின் கீழ் இருந்த கேபிள் டிவி நிறுவனத்தை தன் வசமுள்ள உள்துறைக்கு மாற்றியுள்ளார்.

கேபிள் டிவி நாட்டுடமையாக்கப்படும் என்று அதிமுக தேர்தல் அறிக்கையில் தெரிவிக்கப்பட்டது. அதன்படி கேபிள் டிவியை நாட்டுடமையாக்கும் முயற்சியில் இறங்கியுள்ளார் முதல்வர் ஜெயலலிதா. கடந்த அதிமுக ஆட்சியிலேயே கேபிள் டிவியை நாட்டுடமையாக்க முயன்றார். ஆனால் அது முடியாமல் போனது.

எனவே, இம்முறை கேபிள் டிவியை நாட்டுடமையாக்குவதில் முனைப்பாக உள்ளார்.

கடந்த 22-ம் தேதி அரசு கேபிள் டிவியை செயல்படுத்துவது தொடர்பாக முதல்வர் ஜெயலலிதா கேபிள் ஆபரேட்டர்களை சந்தித்தார். அப்போது இன்னும் 3 மாதத்திற்குள் அரசு கேபிள் டிவி செயல்படத் துவங்கும் என்று அவர்களுக்கு வாக்குறுதியளித்தார். அதற்கு கேபிள் ஆபரேட்டர்கள் நன்றி தெரிவித்தனர்.

கேபிள் ஆபரேட்டர்களுக்கு அளித்த வாக்குறுதிபடி அரசு கேபிள் டிவியை 3 மாதத்திற்குள் துவங்க தீவிர நடவடிக்கைகள் எடுத்து வருகிறார். இதில் முதல்கட்டமாக அரசு கேபிள் டிவி நிறுவனத்தை தனது கட்டுப்பாட்டில் உள்ள உள்துறைக்கு மாற்றியுள்ளார்.

இவ்வாறு செய்ததன்மூலம் அரசு கேபி்ள் டிவி நிறுவனத்தின் செயல்பாடுகள் தனது நேரடிப் பார்வையில் இருக்கும். மேலும், அரசு கேபிள் டிவியைத் துவங்குகையில் ஏற்படும் இடையூறுகளை உள்துறையின் கீழ் உள்ள காவல் துறை மூலம் நீக்கி விடலாம் என்று அந்தத் துறை வட்டாரங்கள் தெரிவித்தன.

அரசு கேபிள் டிவியை செயல்படுத்துவது குறித்து நேற்று தலைமை செயலகத்தில் பல்வேறு துறை அதிகாரிகள் கலந்து கொண்ட கூட்டம் நடந்தது. இதற்கு தலைமைச் செயலாளர் தலைமை வகித்தார்.

கடந்த திமுக ஆட்சியில் தான் அரசு கேபிள் டிவி கொண்டு வரப்பட்டது. இந்த திட்டத்தின்கீழ் தமிழகம் முழுவதும் ஆயிரத்து 500-க்கும் மேற்பட்ட கேபிள் ஆபரேட்டர்கள் உள்ளனர். மேலும் தஞ்சாவூர், கோவை, வேலூர், நெல்லை ஆகிய இடங்களில் அரசு கேபிள் டி.வி. நிறுவனத்தின் சார்பில் கட்டுப்பாட்டு அறைகள் அமைக்கப்பட்டன. இந்த அறைகள் ஒவ்வொன்றும் குறைந்தது ரூ. 100 கோடி செலவில் அமைக்கப்பட்டது.

இவ்வளவு செலவு செய்து அமைத்த கட்டுப்பாட்டு அறைகள் தற்போது இயங்காமல் உள்ளன. இவற்றை இயக்க குறைந்த பட்சம் ஒரு கட்டுப்பாட்டு அறைக்கு ரூ. 100 கோடி வீதம் ரூ. 400 கோடி செலவாகும். இது குறித்து அறிவிப்பு நிதி நிலை அறிக்கையிலோ அல்லது அதற்கு முன்னதாகவோ வெளியாகும் என்று எதிர்பார்க்கப்படுகிறது.

முதல்வர் அளித்த வாக்குறுதிபடி 3 மாதத்திற்குள் அரசு கேபிள் டிவி செயல்படத் துவங்கும் என்று தலைமைச் செயலக வட்டாரங்கள் தெரிவிக்கின்றன.

இந்த திட்டத்தின் மூலம் இனி கட்டண சேனல்கள் உள்பட அனைத்து வகையான சேனல்களையும் மக்கள் மிகக்குறைந்த விலையில் கண்டு களிக்கலாம் என்று கேபிள் டிவி ஆபரேட்டர்கள் தெரிவித்தனர்
http://thatstamil.oneindia.in/news/2011/07/02/govt-cable-tv-jaya-take-control-aid0128.html

பத்மநாபசாமி கோயிலில் பிரமிக்க வைக்கும் நகை குவியல்... ரூ 50 ஆயிரம் கோடி மதிப்பு!!

திருவனந்தபுரம்: பத்மநாபசாமி கோவில் ரகசிய அறைகளில் உள்ள நகைகளின் மதிப்பு ரூ.50 ஆயிரம் கோடிக்கு மேல் என மதிப்பிடப்பட்டுள்ளன. இவற்றில் 10 கிலோ எடையுடன் 18 அடி நீள தங்க மாலை ஒன்றும் கண்டெடுக்கப்பட்டுள்ளது.

கேரள மாநில தலைநகர் திருவனந்தபுரத்தில் பிரசித்தி பெற்றது பத்மநாபசாமி கோவில். இது ஒரு வைணவத் திருத்தலம்.

திருவாங்கூர் மன்னர் பரம்பரைக்குச் சொந்தமான அறக்கட்டளையின் கட்டுப்பாட்டில் இந்த கோவில் இருந்து வருகிறது. இந்த கோவில் கருவறைக்கு அருகே 6 ரகசிய பாதாள அறைகள் நீண்ட காலமாக பூட்டப்பட்டு இருந்தன.

அந்த பாதாள அறைகளை திறந்து, உள்ளே இருக்கும் நகைகள் மற்றும் விலை உயர்ந்த பொக்கிஷங்கள் விவரம் குறித்து அறிக்கை தாக்கல் செய்யும்படி, உச்சநீதி மன்றம் சமீபத்தில் உத்தரவு பிறப்பித்தது.

இதற்காக ஓய்வு பெற்ற கேரள உயர்நீதிமன்ற நீதிபதிகள் இருவர் உள்பட 7 பேர் கொண்ட குழு நியமிக்கப்பட்டு உள்ளது. இந்த குழுவினர், 6 ரகசிய அறைகளுக்கும் ஏ,பி,சி,டி,இ,எப் என பெயரிட்டு ஒவ்வொன்றாக திறந்து நகைகளின் விவரங்கள் குறித்து கணக்கெடுத்து வருகிறார்கள்.

ஏ மற்றும் பி அறைகளில் நகைகள் மதிப்பீடு செய்யும் பணி நேற்று முன்தினம் தொடங்கியது. இந்த அறைகளில் மூட்டைகளில் வைக்கப்பட்டிருந்த, தங்க மணிகள், தங்கத்திலான சாமி சிலைகள், தங்க கயிறு, தங்க கிரீடங்கள், தங்க மாலைகள் இருப்பது கண்டு பிடிக்கப்பட்டன.

கேரள பட்ஜெட்டை விட அதிகம்

அவற்றில் விலைமதிக்க முடியாத அபூர்வமான வைரம், வைடூரியம் உள்பட நவரத்தின கற்கள் பதிக்கப்பட்டுள்ளன. அனைத்து அறைகளில் உள்ள தங்கம், வைரம், வைடூரியம், ரத்தினம் ஆகியவற்றின் மதிப்பு ரூ.50 ஆயிரம் கோடிக்கு மேல் இருக்கும் என்று கணக்கிடப்பட்டு உள்ளது.

கேரள மாநில ஆண்டு பட்ஜெட்டின் வருவாய் அளவே ரூ.35 ஆயிரம் கோடிதான். இந்த நிலையில் பத்மநாபசாமி கோவிலில் உள்ள நகைகளின் மதிப்பு ரூ.50 ஆயிரம் கோடியை தாண்டி இருப்பது அனைவரையும் பிரமிக்க வைத்துள்ளது.

அதிலும் குறிப்பாக ஏ அறையில் இருந்த சுமார் 10 கிலோ எடைகொண்ட 18 அடி நீளமுள்ள தங்கச் சங்கிலி இருந்தது கண்டுபிடிக்கப்பட்டது. அது பத்மநாபசுவாமிக்கு அணிவிக்க மன்னரால் வழங்கப்பட்டது என தெரிகிறது.

ஒரு பாதாள அறையின் உள்பகுதியில் 150 ஆண்டுகளுக்கு மேல் திறக்கப்படாத மற்றொரு சிறிய ரகசிய அறை திறக்கப்பட்டது. அந்த அறையில் விஷ வாயு மற்றும் விஷப் பூச்சிகள் இருக்கலாம் என்று சந்தேகம் ஏற்பட்டதால், முதலில் ஆக்சிஜன் வாயு செலுத்தப்பட்டது.

1200 தங்கச் சங்கிலிகள்

அதன்பின்னர் மதிப்பீட்டு குழுவினர், தீயணைப்பு படை வீரர்கள் உதவியுடன் முகக்கவசம் அணிந்து உள்ளே சென்றனர். அங்கும் குவியல் குவியலாக நகைகள்தான் இருந்தன. 1200-க்கு மேற்பட்ட 'சரப்பொலி' என்று அழைக்கப்படும் தங்கச் சங்கிலிகள் ஒரு அறையில் இருந்தன. அவற்றில் 'அவல்' என்று அழைக்கப்படும் ரத்தினக் கற்கள் பதிக்கப்பட்டு இருந்தன.

அவை திருவாங்கூர் மன்னர்கள், ராணிகள் அணிந்த நகைகளாக இருக்கலாம் என்று கருதப்படுகிறது. 3 மணி மகுடங்கள், தங்கத் தாம்பாளங்களில் தங்க நாணயங்களும் இருந்தன. 'சொர்ண தண்டு' என்று அழைக்கப்படும் தங்க செங்கோல், நெக்லஸ் மற்றும் ஏராளமான பதக்கங்களும் குவிந்து இருந்தன.

ஜொலிக்கும் வைரங்கள்

பத்மநாபசுவாமி கோவிலில் உள்ள ரகசிய அறைகளில் அதிக அளவிலான தங்கக் குடங்கள் உள்ளன. அவற்றிற்குள் தங்க க்காசுகள் குவிந்திருந்தன. அவை அனைத்தும் புதிதாக செய்யப்பட்டது போல பொலிவுடன் காணப்பட்டன.

அதேபோல பெரிய ரத்தின கற்கள் பதித்த அரியாசனம், மன்னர்கள் அணியும் கிரீடங்கள், நவரத்தின கற்கள் பதித்த தங்க கிரீடங்கள், பத்மநாபசாமி சிலை என ஒவ்வொன்றும் ஒவ்வொரு கலை வண்ணத்தில் பளிச்சிட்டன.

நெப்போலியன் கால நாணயங்கள்

இவற்றில் பிரஞ்சுப் பேரரசன் நெப்போலியன் காலத்து நாணயங்கள் ஏராளமாக இருந்தன. அதே போல வெனிஸ் நாணயங்கள் மட்டும் 70 கிலோவுக்கும் அதிகமாக இருந்தன.

எண்ணி முடிக்க ஒரு வாரம் ஆகலாம்

சந்தன மண்டபம் என்று அழைக்கப்படும் பகுதியில் உள்ள 'ஏ' அறையில் அனைத்தும் கணக்கிடப்பட்டு மதிப்பீடு செய்யப்பட்டுவிட்டன. அனைத்து அறைகளிலும் உள்ள நகைகளை கணக்கிட்டு மதிப்பீடு செய்ய இன்னும் ஒரு வாரம் ஆகலாம் என்று கருதப்படுகிறது. இவற்றின் மதிப்பையும் சேர்த்தால் இன்னும் பல ஆயிரம் கோடியைத் தாண்டும் என்று தெரிகிறது.

கண்டுபிடிக்கப்பட்ட தங்க நகைக் குவியல்கள் மன்னர் காலத்து நகைகள் என்பதால், அதன் தொழில்நுட்பம், வடிவமைப்பு டிசைன்கள் ஆகியவற்றை பார்ப்பதற்கு பொது மக்களும், தங்க நகை வியாபாரிகளும், நகை வடிவமைப்பாளர்களும் மிகவும் ஆர்வமாக உள்ளனர்.

விலை மதிப்பற்ற நகைகள் இருக்கும் தகவல் பரபரப்பை ஏற்படுத்தி இருப்பதால், பத்பநாபசாமி கோவிலுக்கு பாதுகாப்பு பலப்படுத்தப்பட்டு உள்ளது.

http://thatstamil.oneindia.in/news/2011/07/02/rs-50k-cr-worth-treasure-padmanabha-swamy-temple-aid0136.html

இலங்கைப் பிரச்சனை: பிரதமர் மன்மோகன் சிங் போடும் இரட்டை வேடம்

நாட்டின் பாதுகாப்பிலும், மக்கள் நலனிலும் மிகவும் அக்கறையுள்ளவர் போல் காட்டிக்கொள்வதில் இந்தியாவின் எந்த அரசியல்வாதியையும் விட திறமை வாய்ந்தவர் பிரதமர் மன்மோகன் சிங்.

அமெரிக்காவுடன் செய்து கொண்ட அணு சக்தி ஒத்துழைப்பு ஒப்பந்தத்தில் இருந்து, அணு உலைகளை விற்க முனைந்த அயல் நாட்டு அணு உலை தயாரிப்பாளர்களுக்கு சாதகமாக ‘அணு விபத்து இழப்பீடு சட்ட’த்தை நிறைவேற்றுவதில் காட்டிய உத்வேகத்தை நன்றாக கவனித்த எவருக்கும், பிரதமரின் அக்கறை நாட்டின் மீதா அல்லது தன்னை பிரதமர் ஆக்க பின் சக்தியாகத் திகழ்ந்த அமெரிக்காவின் மீதா என்பதில் எந்தச் சந்தேகமும் இருக்க வாய்ப்பில்லை.

அதே நேரத்தில் மக்களின் பிரச்சனைகள் என்று வரும்போதும், தனது அமைச்சரவை சகாக்களின் ஊழல் என்று வரும்போதும் அதற்கெல்லாம் தான் எந்த விதத்திலும் பொறுப்பாக முடியாது என்று காட்டிக்கொள்வதிலும் அபாரத் திறன் கொண்டவர் நமது பிரதமர். தூய்மையான அரசியல்வாதியாக காட்டிக்கொள்ளும் இந்த பிரதமரின் ஆட்சியில்தான் அதிகபட்ச ஊழல் நடந்துள்ளது என்பது மட்டுமின்றி, இந்தியாவின் வளங்கள் கொள்ளை போய்க்கொண்டிருப்பதும் தடையற்று நடந்துகொண்டிருக்கிறது. இவை யாவற்றையும் மறைக்க இவர் பயன்படுத்தும் ஒரே விடயம் ‘இந்தியாவின் பொருளாதாரம் வளர்ந்துக் கொண்டிருக்கிறது’ என்று புள்ளி விவரத்தை வெளியிடுவதுதான்.

நாட்டின் பொருளாதாரம் வளர்கிறது என்கிறீர்கள், ஆனால் விலைவாசி நாளுக்கு நாள் உயர்ந்துகொண்டேயிருக்கிறது, அதனால் ரூபாயின் வாங்கும் சக்தி (பணவீக்கம்) குறைந்துகொண்டே போகிறதே என்று வினவினால், ‘இவற்றையெல்லாம் ஒரே நாளில் கட்டுப்படுத்தக் கூடிய மத்திரக்கோல் என்னிடம் இல்லை’ என்று சாமர்த்தியமான பதிலைக் கூறுவார். வார்த்தைகளைப் பயன்படுத்தி வாய்ப் பந்தல் போடுவதிலும், பேச வேண்டிய வேளையில் ஒரு வார்த்தை கூட பேசாமல் கமுக்க அமைதி காப்பதிலும் இவர் வெளிப்படுத்தும் இராஜதந்திரம் பொருள் நிறைந்தது.

இப்படிப்பட்ட பிரதமர்தான், இதற்குமேல் அடிக்கடி மக்களிடம் பேச ‘சில’ ஊடகவியலாளர்களை மட்டும் அழைத்துப் பேசியுள்ளார். அவர்கள் கேட்ட ஒரிரு வினாக்களுக்கும் பதிலளித்து தான் ‘செயல்படும்’ பிரதமர்தான் என்று நிரூபித்துள்ளார். இந்தச் சந்திப்பில் அவர் இலங்கைத் தமிழர் பிரச்சனை குறித்தும் பேசியுள்ளார். பிரதமரின் வாய் ஜாலத்தை அறிந்திராத தமிழர்கள் அதனை புரிந்துகொள்ள முடியாமல் தலை சுற்றி நிற்கின்றனர்.

“இலங்கைத் தமிழர்களின் எதிர்பார்ப்பு நியாயமானதுதான். அந்நாட்டில் வாழும் அனைத்துப் பிரிவு மக்களும் சம உரிமை பெற வேண்டும் என்பதை இலங்கை அரசிடம் தொடர்ந்து வலியுறுத்துவோம்” என்று கூறியுள்ளார். அப்படியானால் இலங்கைத் தமிழர்கள் அந்நாட்டு அரசால் சம உரிமையுடன் நடத்தப்படவேண்டும் என்பதற்காக மன்மோகன் சிங் அரசு பொறுப்பேற்ற இந்த 7 ஆண்டுகளில் செய்தது என்ன?

கடந்த மாதம் 10, 11ஆம் தேதிகளில் இலங்கை சென்ற தேச பாதுகாப்பு ஆலோசகர் சிவ்சங்கர் மேனன் தலைமையில் சென்றக் குழு அந்நாட்டு அதிபர் ராஜபக்சவை சந்தித்து ஒன்றரை மணி நேரம் பேசியது. இந்தச் சந்திப்பின்போது அந்நாட்டு அயலுறவு அமைச்சர் பெய்ரீஸ், இந்திய அயலுறவுச் செயலர் நிருபமா ராவ், பாதுகாப்புச் செயலர் பிரவீன் குமார் ஆகியோரும் இருந்தனர். இந்தச் சந்திப்பிற்குப் பிறகு கொழும்புவில் செய்தியாளர்களிடம் பேசிய சிவ்சங்கர் மேனன், “இலங்கைத் தமிழர்களுக்கான ஒரு அரசியல் ஏற்பாட்டை உடனடியாக உருவாக்க வேண்டும்” என்று ராஜபக்சவை வலியுறுத்தியதாகக் கூறினார். ஆனால், நேற்று முன் தினம் கொழும்புல் செய்தியாளர்களிடம் பேசிய மகிந்த ராஜபக்ச, “சிறுபான்மைத் தமிழர்களின் பிரச்சனைக்கு அரசியல் தீர்வு காணுமாறு இந்தியா தன்னை நிர்பந்திக்கவில்லை” என்று கூறினாரே! இதுதான் மன்மோகன் அரசு ‘தொடர்ந்து வலியுறுத்துவ’தன் இலட்சணமா?

“விடுதலைப் புலிகள் அழிக்கப்பட்டது நல்லது. ஆனால் அதற்குப் பிறகும் தமிழர் பிரச்சனை மறையவில்லை” என்று மன்மோகன் கூறுகிறார். அதாவது மன்மோகன் அரசு எதிர்பார்த்தது: விடுதலைப் புலிகளை அழித்துவிட்டால் தமிழர் பிரச்சனையும் அழிந்துவிடும் என்பதுதானே? அதற்காகத்தானே அந்த இயக்கத்தை பயங்கரவாத இயக்கம் என்று அமெரிக்கா உள்ளிட்ட நாடுகளை முத்திரைக்குத்த வைத்து, அதற்கு எதிரான போரில் இலங்கை அரசுக்கு ‘எல்லா விதத்’திலும் உதவியது? ஆனால் புலிகள் அழிந்துவிட்டார்கள், பிரச்சனை அழியவில்லை! இலங்கை தமிழர்கள் சம உரிமை பெற வேண்டும் என்பதுதான் இந்திய அரசின் நோக்கமென்றால், அதனை உறுதி செய்துக்கொண்டு பிறகு ராஜபக்ச நடத்திய போருக்கு உதவியிருக்க வேண்டும். ஆனால் இந்திய அரசின் நோக்கம் வேறு. ஈழத் தமிழர்கள் பிரச்சனையை ‘முடிக்க’ சிங்கள இனவெறி ராஜபக்ச அரசுக்கு உதவி, அதன் மூலம் அந்நாட்டின் ‘நட்பை’ (சீனாவை புறந்தள்ள வைத்து) உறுதி செய்துக்கொள்ள வேண்டும்.

“நீங்கள் வேறு எந்த நாட்டையும் நாட வேண்டாம், எல்லா உதவிகளையும் நாங்கள் செய்கிறோம்” என்றல்லவா...
இரகசிய ஒப்பந்தம் போட்டுக்கொண்டு தமிழினத்தை அழிக்க ராஜபக்சவுக்கு உதவினார்கள். இந்த உண்மை வெளிவந்துவிடக்கூடாது என்பதற்காகத்தானே இலங்கைக்கு அரசுக்கு எதிராக பன்னாட்டு நடவடிக்கைகளை எதிர்க்கிறது இந்திய அரசு.

“தமிழர்கள் சுய மரியாதையுடனும், சம உரிமையுடைய குடிமக்களாகவும், கண்ணியத்துடன் வாழ்வதற்கான புதியதொரு சீர்திருத்தத்தை கொண்டு வர வேண்டும்” என்பதே இந்திய அரசின் விருப்பம் என்றால், அதனை ராஜபக்ச நடத்திய போருக்கு உதவியதன் மூலம் எவ்வாறு சாதிக்க நினைத்தீர்கள்? இன்றைக்கு போர் முடிந்து 2 ஆண்டுகள் ஆகிவிட்டதே, அந்த இலக்கில் என்ன முன்னேற்றம் கண்டிருக்கிறீர்கள்?

ஆனால், அது “அவ்வளவு எளிதல்ல” என்று கூறியுள்ள மன்மோகன் சிங், “சிறிலங்க மக்கள் தொகையில் சூடான தலைகள் இருக்கின்றனர். சிங்கள இனவாதம் என்பது உண்மையே” என்று கூறுகிறார். என்னே விநோதம்! இலங்கையின் அரசியல் என்பதே சிங்கள பெளத்த இனவாதம் என்பதால்தானே அங்கு தமிழர்கள் தொடர்ந்து வஞ்சிக்கப்பட்டார்கள்? அதற்கு எதிராக அவர்கள் சாத்வீக வழியில் போராடி தோற்ற நிலையில்தானே, தங்களை அழிக்கும் சிங்கள இனவெறி அரசிற்கு எதிராக ஆயுதப் போராட்டத்தில் ஈடுபட்டார்கள்? இதைத்தானே முன்னாள் பிரதமர் இந்திரா காந்தி ஒப்புக்கொண்டு, அப்படி ஆயுதம் ஏந்திய தமிழ் இளைஞர்கள் குழு அனைத்திற்கும் ஆயுத உதவியும் பயிற்சியும் அளித்தார். இந்த உண்மை தெரிந்தும், தமிழர்களுக்கு எதிரான இனப் படுகொலைப் போருக்கு எல்லா வித்திலும் உதவியது ஏன்? இந்தியாவின் போரைத்தான் நான் நடத்தினேன் என்று ராஜபக்ச கூறியதனாரே, அதன் பொருள் என்ன? இலங்கையில் இந்தியா போர் நடத்த என்ன அடிப்படை இருக்கிறது?

மன்மோகன் சிங் அரசின் நோக்கம், தமிழர்கள் அங்கு சம உரிமை பெற்று கண்ணியத்துடன் வாழ வேண்டும் என்பதல்ல. தமிழர் நலனை அது உண்மையுடன் நேசித்திருந்தால், “இலங்கைத் தமிழர் பிரச்சனைக்கு பேச்சுவார்த்தையின் மூலம் அங்குள்ள அனைத்து இன மக்களும் ஏற்றுக்கொள்ளக் கூடிய நீடித்த அரசியல் தீர்வைக் காண வேண்டும்” என்கிற வெளிப்படையாக அறிவிக்கப்பட்ட நிலையை கடைபிடித்திருக்கும். அதையே அந்நாட்டிடம் வலியுறுத்தியிருக்கும், போருக்கு உதவியிருக்காது. அதைச்செய்யாமல், தமிழர் பிரச்சனையை பகடையாக்கி, அப்பிரச்சனையை அழிக்க இலங்கை இனவாத அரசுக்கு உதவி, அதன் மூலம் அந்நாட்டின் நட்பைப் பெற வேண்டும் என்றுதான் மன்மோகன் அரசு திட்டமிட்டது. அதனால்தான் அது இரண்டரை ஆண்டுக்காலத்தில் ஒன்றரை இலட்சம் தமிழர்களை கொன்று குவித்த இனப் படுகொலைக்குத் துணைபோனது. டெல்லியில் இருக்கும் பத்திரிக்கைகளின் ஆசிரியர்களிடம் பேசிய இந்த விடயத்தை இங்கு தமிழகப் பத்திரிக்கையாளர்களிடம் பேசியிருந்தால் இந்தக் குட்டு வெளிப்பட்டிருக்கும். ஆனால் பாதுகாப்பான இடத்தில் இருந்துகொண்டு வசதியாக உண்மையை மறைக்கிறார் பிரதமர் மன்மோகன் சிங்.

இலங்கை அரசுடன் இணைந்து தமிழினப் படுகொலை செய்த மன்மோகன் சிங் அரசு, சர்வதேசத்தால் குற்றம்சாற்றப்படும் இலங்கை அரசை காப்பாற்றும் முயற்சியில் இன்றுவரை இரகசியமாக ஈடுபட்டு வருகிறது. அதற்கான முன்னெடுப்புகளை உறுதி செய்யவே சிங்சங்கர் மேனன் தலைமையிலான குழு கொழும்பு சென்றது. அவர்கள் பேசியது வேறு, பேசியதாகச் சொன்னது தமிழர் பிரச்சனையை. அந்தக் கெட்டிக்காரன் பொய்தான் இரண்டு வாரத்தில் வெளிப்பட்டுவிட்டது.

ஆனால், இன்றைக்கு இவ்வளவு அக்கறையோடு ஈழத் தமிழர் பிரச்சனையை மன்மோகன் சிங் பேசக் காரணம், தமிழக சட்டப் பேரவைத் தேர்தலில் காங்கிரஸ் கட்சிக்கு விழுந்த மரண அடி. இதே நிலை நீடித்தால் அடுத்த நாடாளுமன்றத் தேர்தலில் காங்கிரஸ் கட்சிக்கு ஒரு இடம் கூடத் தேறாது என்பதை புரிந்துகொண்டு, வெற்றி பெற்றுள்ள அ.இ.அ.தி.மு.க.வை தன் பக்கம் இழுத்துக்கொண்டு தொடர்ந்து தமிழ் மக்களை ஏமாற்ற எடுத்துள்ள முயற்சி.


அதனால்தான், வேறு எந்த மாநில முதலமைச்சருக்கும் வழங்காத வரவேற்பை அவர் தமிழக முதல்வர் ஜெயலலிதா டெல்லி சென்றபோது வழங்கியுள்ளார். அவர் தங்கியிருந்த இல்லத்தில் இருந்து புதிய தார் சாலை போட்டு, காரை அனுப்பி அழைத்துவரச் செய்து சந்தித்துள்ளார்.

இதையெல்லாம் புரிந்துகொண்டு தமிழக முதல்வர் செயல்பட வேண்டும். டெல்லிக்காரன் கொடுக்கும் மரியாதையெல்லாம் காரியத்தில் கண் வைத்து செய்யப்படுவது என்பதை புரிந்துகொள்ள வேண்டும். இல்லையென்றால் தமிழக முதல்வராக இருந்த கருணாநிதியை ஊழலைக் காட்டி வளைத்து எப்படி தமிழினப் படுகொலையை முடித்தார்களோ அதேபோல் இப்போதும் ஒரு திட்டத்தைத் தீட்டி ஈழத் தமிழனின் உரிமைகளுக்கு சாவு மணி அடித்து விடுவார்கள்.
http://tamil.webdunia.com/newsworld/news/currentaffairs/1107/01/1110701081_2.htm

பத்மநாப சுவாமி கோவிலில் பிரமிக்க வைக்கும் தங்க புதையல்: சுரங்க அறைகளில் தேடல் தொடர்கிறது

திருவனந்தபுரம்: கேரள மாநிலம், திருவனந்தபுரம் பத்மநாப சுவாமி கோவிலில், ரகசிய அறைகளில் இருந்து விலைமதிப்பற்ற தங்கம், அணிகலன்கள் உள்ளிட்ட பொருட்களை வெளியில் எடுக்கும் பணி தொடர்கிறது. இங்கு சுரங்க அறைகளில் இருந்து இதுவரை கிடைத்த பொருட்கள் மதிப்பு பல ஆயிரம் கோடி ரூபாய் இருக்கும். இதையடுத்து, தற்போது கோவில் பகுதிகளில் கேரள அரசு பலத்த பாதுகாப்பு ஏற்பாடுகளை செய்திருக்கிறது.

திருவாங்கூர் அரச குடும்பத்தினரின் நிர்வாகத்தில் உள்ள திருவனந்தபுரம் பத்மநாப சுவாமி கோவிலில் உள்ள நான்கு ரகசிய அறைகளை திறக்க கோரி, சுப்ரீம் கோர்ட்டில் பொதுநல மனு ஒன்று தாக்கல் செய்யப்பட்டது. இம்மனுவை விசாரித்த சுப்ரீம் கோர்ட், ரகசிய அறைகளை திறப்பதற்கு முன்னாள் நீதிபதிகள் உள்ளிட்ட ஏழு பேர் கொண்ட குழுவை நியமித்து உத்தரவிட்டதோடு, பத்மநாப சுவாமி கோவிலை மாநில அரசு எடுத்து கொள்வதற்கு தடையும் விதித்தது. சுப்ரீம் கோர்ட் நியமித்த இக்குழு, கடந்த ஜூன் 27ம் தேதி அறைகளை திறக்க துவங்கியது. மூன்று அறைகளில் இருந்த பொருட்கள் பட்டியலிடப்பட்ட நிலையில், நான்காவது அறை நேற்று முன்தினம் திறக்கப்பட்டது. அதில் பிரமிக்கத்தக்க அளவில், விலைமதிப்பில்லாத வைர, வைடூரிய, தங்க, வெள்ளி பொருட்கள் இருந்தன.இவைகளைக் கண்டெடுத்து தூசி நீக்கி அதன் பின் மதிப்பீடு செய்வது என்பதால் பணியில் தாமதம் உள்ளது. இந்த அறை, கடந்த 130 ஆண்டுகளாக பூட்டிக் கிடந்தது. இதில், தங்க நகைகள், ஆபரணங்கள், கற்கள் பதித்த கிரீடங்கள், தங்க பாத்திரங்கள், தங்க தாம்பாளங்கள், விளக்குகள், தங்கத்தாலான வழிபாட்டுப் பொருட்கள் மற்றும் பல்வேறு பாரம்பரிய கலைநயம் மிக்க பொருட்கள் இருந்தன. இன்றைய நிலையில், இவற்றின் மதிப்பை கணக்கிடுவது மிகச்சிரமம் என்றே நிபுணர்கள் கருதுகின்றனர். இருப்பினும் இவை அனைத்தும் இன்றைய பண மதிப்பில், 20 ஆயிரம் கோடியை ரூபாயை தாண்டினாலும் வியப்பில்லை என்று கூறப்படுகிறது.

இதற்கிடையில், இந்த நான்காவது அறையில் உள்ள பொருட்களின் பட்டியலையும், அவற்றின் மதிப்பையும் தயாரிக்க சில நாட்கள் ஆகலாம் என்று எதிர்பார்க்கப்படுகிறது. இது குறித்து குழு உறுப்பினர் ஒருவர் கூறுகையில், "அவற்றை அவ்வளவு எளிதில் கையில் எடுத்து வேறொரு இடத்திற்கு மாற்ற முடியாது. முதலில் அவற்றை தூய்மை செய்து, பாதுகாப்பான இடத்தில் வைத்த பின்னர் தான் மதிப்பிட வேண்டியுள்ளது. அதனால், அதற்கு சில நாட்கள் ஆகும். இது குறித்த முழு அறிக்கையும் சுப்ரீம் கோர்ட்டில் தாக்கல் செய்யப்படும்' என்றார். மதிப்பிட முடியாத பொருட்களை கணக்கிடும் பணி மேலும் சில நாட்கள் தொடரும் என்பதால், கோவிலுக்கான பாதுகாப்பை மேலும் அதிகரிக்க மாநில அரசு முடிவெடுத்துள்ளது. இந்நிலையில், இது குறித்து நேற்று செய்தியாளர்களுக்கு பேட்டியளித்த முதல்வர் உம்மன் சாண்டி, "கோவில் பாதுகாப்பு ஏற்கனவே உறுதியாக உள்ளது. எனினும் பாதுகாப்பை மேலும் பலப்படுத்தும்படி அதிகாரிகளுக்கு உத்தரவிடப்பட்டுள்ளது' என்றார்.

ஆபரணங்கள் மதிப்பீடு எவ்வளவு காலமாகும்? திருவனந்தபுரம் பத்மநாப சுவாமி புராதனமான பெருமை மிக்க கோவில். தமிழகம், கேரளாவில் உள்ள பல கோவில்கள் முன் அன்னிய படையெடுப்பு காலங்களில், மன்னர்களும் மக்களும் கொடுத்த விலை மதிப்பற்ற பொருட்களை பாதுகாப்பாக வைக்க ரகசிய அறை அமைத்தது உண்டு. ஆனால், இதுவரை ரகசிய அறையில் இருந்து இந்த அளவு விலை மதிப்பற்ற பொருட்கள் வேறெங்கும் கிடைத்ததாக தெரியவில்லை. சுப்ரீம் கோர்ட் உத்தரவுபடி இதை கண்டுபிடித்து கணக்கிடும் பணி என்பதால், சுரங்க அறைக்குள் செல்வோர், அங்குள்ள நச்சு ஏதாவது பாதிப்பு ஏற்படுத்தக் கூடாது என்ற முன்னெச்சரிக்கையுடன் ஆக்சிஜன் கவசம் அணிந்து பாதுகாப்பாக தேடியுள்ளனர். கடவுளுக்கு அணிவிக்கப்படும் தங்க, கல் பதித்த ஆபரணங்கள் ஆயிரக்கணக்கில் கண்டுபிடித்துள்ளனர். இம்மாதிரி ஆபரணம் ஒன்று 18 அடி நீளம் இருப்பதாக கூறப்படுகிறது. இது குறித்து தொல்பொருள் துறையினர் மற்றும் அத்துறையில் நிபுணர்கள் மதிப்பீடு செய்ய காலதாமதம் ஆகும் என்று கூறப்படுகிறது. தவிரவும் இந்த அறைகள் எப்போது உருவாக்கப்பட்டன. கோவில் வரலாறு கூறும் மற்ற தகவல்கள் கிடைக்கலாம் என்ற கருத்தும் உள்ளது.
http://www.dinamalar.com/News_Detail.asp?Id=267858

திருவனந்தபுரம் பத்மநாபசுவாமி கோவிலில் இதுவரை கணக்கிடப்பட்ட நகைகளின் மதிப்பு ரூ. 20 ஆயிரம் கோடி

திருவனந்தபுரம்: திருவனந்தபுரத்தில் உள்ள பத்மநாபசுவாமி கோவிலில் உள்ள பாதாள அறை ஒன்றில் இருந்து இதுவரை கண்டுபிடித்து எடுக்கப்பட்டுள்ள நகைகளின் மதிப்பு ரூ. 20 ஆயிரம் கோடி என்று தெரிய வந்துள்ளது. இன்னும் 2 பாதாள அறைகள் திறக்கப்பட வேண்டியுள்ளதால் நகைகளின் மதிப்பு மிகப் பெரிய அளவில் உயரும் வாய்ப்புகள் உள்ளன.

திருவனந்தபுரத்தில் உள்ள பத்மநாபசுவாமி கோவில் மிகவும் பழமையானது. இங்கு ஆறு பாதாள அறைகள் உள்ளன. அதில் என்ன உள்ளது என்பதைத் திறந்து பார்க்க உத்தரவிட வேண்டும் என்று கோரி உச்சநீதிமன்றத்தில் வழக்கு தொடர்பபட்டது. இதை விசாரித்த உச்சநீதிமன்றம் 2 முன்னாள் கேரள உயர்நீதிமன்ற நீதிபதிகள் தலைமையிலான 7 பேர் குழுவை அமைத்து பாதாள அறைகளை ஆய்வு செய்ய உத்தரவிட்டது.

அதன்படி மொத்தம் உள்ள 6 பாதாள அறைகளில் 4 அறைகளை இக்குழு ஆய்வு செய்து பார்த்தது. அப்போது பத்திரிக்கையாளர்கள் யாரும் அனுமதிக்கப்படவில்லை. இந்த ஆய்வின்போது பெருமளவிலான நகைகள்,பாத்திரங்கள், பணம் உள்ளிட்டவை கிடைத்தன. அவற்றின் மதிப்பை அறிய கணக்கீடு செய்யப்பட்டது. இந்த மதிப்பீட்டில் அவற்றின் மொத்த மதிப்பு ரூ. 1000 கோடி இருக்கும் என முதலில் தெரிவிக்கப்பட்டது.

ஆனால் தற்போதோ இந்த மதிப்பு ரூ. 20,000 கோடியாக உயர்ந்துள்ளது. திருவாதாங்கூர் மன்னர்கள் அணிந்திருந்த விலைமதிப்பற்ற காசி நெக்லசுகள், மகுடங்கள், நகைகள், விலைமதிப்பற்ற கற்கள் ஆகியவை கண்டெடுக்கப்பட்டுள்ளன.

இது தவிர 3 மகுடங்கள், ஒரு பத்மநாபசுவாமி சிலை, அவல் என்னும் விலைமதிப்பற்ற கற்கள் பதித்த ஆயிரம் சரத்போலி செயின்கள் கண்டுபிடிக்கப்பட்டுள்ளது. இதில் ஒரு செயின் மட்டும் 18 அடி நீளம் உள்ளது. ஏராளமான தங்க செங்கோல்கள் மற்றும் பதக்கங்களும் அதில் இருந்தன.

இந்த பாதாள அறைகள் பல நூற்றாண்டுகளாக திறக்கப்படாமல் உள்ளதால் அங்கு விஷவாயு இருக்கக்கூடும் என்று அஞ்சப்பட்டதால் முதலில் ஆக்சிஜன் செலுத்தப்பட்டது. பிறகு அங்கு செல்லும் அனைவருக்கும் ஆக்சிஜன் மாஸ்க் கொடுக்கப்பட்டது. மீதமிருக்கும் ஒரு அறை இன்று திறக்கப்படுகிறது.

18-வது நூற்றாண்டில், திருவாங்கூர் சமஸ்தானத்தின் மார்த்தாண்ட வர்மாவால் கட்டப்பட்டது இந்தக் கோவில். திருவாங்கூர் சமஸ்தான குடும்பத்தினரைக் கொண்ட அறக்கட்டளை மூலம் இக்கோவில் நிர்வகிக்கப்பட்டு வருகிறது என்பது குறிப்பிடத்தக்கது.


http://thatstamil.oneindia.in/news/2011/07/01/kerala-mother-all-treasure-troves-unearthed-aid0128.html

ஃபேஸ்புக்கை ஒரு கை பார்க்க வரும் கூகுள் ப்ளஸ்!!

சமூக வலை தளங்கள் எனப்படும் ஃபேஸ் புக் மற்றும் ட்விட்டரின் வரவு ஜாம்பவான் இணைய தளங்களை அசைத்துப் பார்த்துவிட்டன.

இதன் விளைவு பெரிய நிறுவனங்களும் ஒரு சமூக வலைத் தளத்தை ஆரம்பிக்க வேண்டிய நெருக்கடிக்குள்ளாகியுள்ளன.

அந்த வகையில், தனக்கு பெரும் போட்டியாகத் திகழும் ஃபேஸ்புக்கை சமாளிக்க தானும் ஒரு சமூக வலைத்தளத்தை ஆரம்பிக்கிறது உலகின் நம்பர் ஒன் இணையதளமான கூகுள் நிறுவனம்.

இதற்கு கூகுள் ப்ளஸ் என பெயரிட்டுள்ளது.

இதுகுறித்து கூகுள் நிறுவன பொறியியல் பிரிவு மூத்த துணை தலைவர் குண்டோத்ரா தனது வலைப்பதிவில் இப்படிக் குறிப்பிட்டுள்ளார்:

சமூக இணையத்தளம் எனப்படும் சமூகவலை தளங்களில் மக்கள் பெரும் ஆர்வம் க‌ாட்டி வருகின்றனர்.

அவர்களின் ஆவலை பூர்த்தி செய்யும் விதமாக சமூக இணையதளத்தை உருவாக்கும் முயற்சியில் கூகுள் நிறுவனம் ஈடுபட்டிருந்தது. தற்போது கூகுள் பிளஸ் என்ற பெயரில் புதிய ‌தொழில்நுட்பத்திலான சமூக இணையதளத்தை அறிமுகப்படுத்தியுள்ளோம்.

இந்த புதிய சமூக இணையத்தளம் பேஸ்புக் தளம் போன்றதுதான் என்றாலும், அதைவிட கூடுதல் வசதிகளை பெற்றுள்ளது. இந்த புதிய சேவையினை ஆண்ட்ராய்ட் ஆபரேடிங் சிஸ்டத்தை அடிப்படையாகக் கொண்டு இயங்கும் மொபைல் ஷாப்களிலும் பெற்றுக்கொள்ளலாம். இப்போது சோதனை ஓட்டமாக இது அறிமுகப்படுத்தப்பட்டுள்ளது.

சர்க்கிள்ஸ், ஸ்பார்க்ஸ், ஹேங்அவுட்ஸ் மற்றும் மொபைல் உள்ளிட்ட ‌சிறப்பம்சங்களை உள்ளடக்கியது இந்த புதிய தளம். வரும் நாட்களில் இந்த தளம் வாடிக்கையாளர்களின் அபிமானத்துக்குரிய தளமாக மாறும் என நம்புகிறோம்."

-இவ்வாறு அதில் குறிப்பிட்டுள்ளார்.

முதல் கட்டமாக குறிப்பிட்ட பயனாளர்களுக்கு கூகுள் ப்ளஸ் அழைப்பு அனுப்பி வருகிறது.

இன்றைய தேதிக்கு பேஸ்புக்கிற்கு 600 மில்லியன் பயனாளர்கள் உள்ளனர். இத்தனை வலுவான பேஸ்புக்கை கூகுள் ப்ளஸ் ஒரு கை பார்க்குமா... பார்க்கலாம்!


http://thatstamil.oneindia.in/news/2011/07/01/google-challenges-facebook-google-plus-aid0136.html

இந்திய கடற்படைக்கு இலங்கையிடமிருந்து அதிவேக படகுகள் வாங்க முடிவு

இந்தியக் கடற்படைக்கு இலங்கையிடமிருந்து எண்பது அதிவேக படகுகள் வாங்க இந்திய பாதுகாப்புத் துறை அமைச்சகம் முடிவு செய்துள்ளதாகவும், இது தொடர்பாக இரு நாடுகளுக்கும் இடையே ஒப்பந்தம் ஏற்பட்டுள்ளதாகவும் செய்தி வெளியாகி உள்ளது.

இந்தியா- இலங்கை இடையேயான இராணுவ ஒத்துழைப்பு குறித்த உயர்மட்ட அளவிலான பேச்சுவார்த்தை டெல்லியில் நடைபெற்ற நிலையில் இந்த செய்தி வெளியாகி உள்ளது.

இந்தியக் கடலோரக் காவல் படையின் பயன்பாட்டுக்காகவே இந்த 80 அதிவேகப் படகுகளும் கொள்முதல் செய்யப்படவுள்ளதாக இலங்கை மற்றும் இந்திய பாதுகாப்பு அமைச்சகத்திற்கு நெருக்கமான வட்டாரங்களை மேற்கோள்காட்டி செய்தி வெளியிடப்பட்டுள்ளது.

இந்தியா கொள்முதல் செய்யவுள்ள இந்த 80 அதிவேகப் படகுகளின் விலை சர்வதேச சந்தையில் அறுபத்தியேழு மில்லியன் டாலர்களாகும்.

இலங்கை அரசின் முதலீட்டு வாரியத்தின் கீழ் ஏற்படுத்தப்பட்டுள்ள "சோலாஸ் மரைன் லங்கா பிரைவேட் லிமிடெட்" என்ற துபாயை தலைமையிடமாகக் கொண்டு இயங்கும் ஒரு பன்னாட்டு நிறுவனமே இந்த படகுகளை தயாரிக்கிறது.

இந்த படகுகள் மணிக்கு ஐம்பது கடல் மைல்கள் வேகத்தில் பயணம் செய்யக் கூடியவையாகும். அத்துடன் ஐ.எஸ்.ஓ. சர்வதேச தரச் சான்றிதழையும் பெற்றுள்ளதாகவும் தெரிய வந்துள்ளது.

விடுதலைப்புலிகளுடனான யுத்தம் முடிவுற்ற பின் இராணுவத் தளவாடங்களை உற்பத்தி செய்து, வெளிநாடுகளுக்கு விற்பனை செய்யும் நடவடிக்கையில் இலங்கை ஆர்வம் காட்டி வருகின்ற நிலையில், இலங்கையின் பொருளாதாரத்தை கைகொடுத்து தூக்கிவிடும் நோக்கில் இந்த் ஒப்பந்தத்தை இந்தியா செய்துகொண்டுள்ளதாக தெரிகிறது.

இலங்கைக்கு எதிராக இந்தியாவினால் பொருளாதாரத் தடை விதிக்கப்பட வேண்டுமென்று தமிழக முதலமைச்சர் ஜெயலலிதா வேண்டுகோள் விடுத்துள்ள நிலையில், இந்திய மத்திய அரசாங்கம், இலங்கையிடமிருந்து படகுகளை வாங்க முடிவு செய்துள்ளதாக செய்தி வெளியாகி இருப்பது குறிப்பிடத்தக்கது.

http://tamil.webdunia.com/newsworld/news/international/1107/01/1110701076_1.htm

எந்தநாள் எதற்கு நல்லநாள்: ஓர் ஆய்வு

காலில் சக்கரம் கட்டிக்கொண்டு ஓடும் இன்றைய எந்திர வாழ்க்கையில் எந்தெந்த விடயங்களை எந்தெந்த கிழமைகளில் செய்தால் சாதகமாக இருக்கும் என்பது குறித்த ஒரு ஆராய்ச்சியை "லண்டன் ஸ்கூல் ஆப் எகனாமிக்ஸ்" மேற்கொண்டுள்ளது.அந்த ஆராய்ச்சியில் தெரியவந்துள்ள விடயம் இதோ:

திங்கள்:
மன அழுத்தத்திலிருந்து விடுபடுவது:

வார விடுமுறை முடிந்து வேலை நாட்கள் தொடங்கும் திங்கட்கிழமை,ஏறக்குறைய உலகம் முழுவதுமே டென்ஷனான தினமாகவே உள்ளது.அலுவலகம் செல்வோர்கள், பள்ளி மற்றும் கல்லூரிகளுக்கு செல்வோர்கள் என வயது வித்தியாசமின்றி அனைத்து தரப்பினருக்குமே திங்கட்கிழமை என்பது ஒரு படபடப்பு மிகுந்த நாள்தான்.அப்படியெனில் அன்றைய தினம் பி.பி.( ரத்த அழுத்தம்) எகிறும் என்பதை சொல்லவேண்டியதே இல்லை.எனவேதான் திங்கட்கிழமையை தங்களுக்கு பிடித்த வகையில் மன அமைதியை ஏற்படுத்திக்கொள்ளும் தினமாக ஆக்கிக்கொள்ள வேண்டும் என்பது ஆய்வாளர்களின் அட்வைஸ்.

செவ்வாய்க்கிழமை:
செய்யவேண்டியவற்றை பட்டியலிடலாம்:
செவ்வாய்க்கிழமையன்று ஏறக்குறைய நாம் வழக்கமான வேலை "மூடு" க்கு திரும்பியிருப்போம்.எனவே அன்றைய தினம்,வீட்டு விடயம் ஆனாலும் சரி; அலுவலக விடயம் ஆனாலும் சரி, செய்து முடிக்கவேண்டிய அல்லது செய்ய நினைக்கும் காரியங்களுக்கான திட்டமிடலை செய்துகொள்ளலாம்.வாரத்தின் தொடக்கத்தில் இருப்பதால் அன்றைய தினம் நமது மூளையின் இடதுபக்க இயக்க செயல்பாடு ஆதிக்கம் அதிகம் இருக்கும் என்றும்,எனவே வழக்கமான பணிகளை செய்வதற்கு செவ்வாய்க்கிழமை உகந்த நாள் என்று கூறுகிறது "தொழிலக மற்றும் நிறுவனங்களுக்கான மனோதத்துவ" ஆராய்ச்சி ஒன்று!

புதன்:
காதல் செய்ய சிறந்த தினம்:

காதலை சொல்ல, முதல் டேட்டிங்கிற்கு சம்மதம் பெற, காதலர்கள் சந்தித்துக்கொள்ள புதன்கிழமை மகா உசிதமான கிழமை என்கிறார்கள் இந்த ஆராய்ச்சியை மேற்கொண்டவர்கள்.இது தொடர்பாக நடத்தப்பட்ட ஆய்வில் கலந்துகொண்டு கருத்து தெரிவித்த சுமார் 8,000 பேர்களில் 40 க்கும் அதிகமான விழுக்காட்டினர் காதல் செய்ய புதன்கிழமைக்கே ஜே...! போட்டுள்ளனர்.மேலும் வெள்ளிக்கிழமை மாலை அல்லது சனிக்கிழமை தங்களது சந்திக்கலாம் அல்லது டேட்டிங்-குறைந்தபட்சம் பீச் அல்லது சினிமாவுக்காவது போகலாம் என்பதை முடிவு செய்துகொள்ள இரண்டு,மூன்று நாட்கள் அவகாசம் இருப்பதால், அநாவசிய மனமுறிவு ஏற்படாது.ஒருவேளை காதலன் அல்லது காதலி யார் மறுப்பு தெரிவித்துவிட்டாலும், உறவினர் அல்லது நண்பர்கள் வீட்டிற்கு செல்வத்யு குறித்தாவது திட்டமிட்டுக்கொள்ள முடியும்.

சம்பள உயர்வும் கேட்கலாம்:

இவையெல்லாவற்றையும் விட அலுவலகத்தில் புரமோஷன் அல்லது சம்பள உயர்வு குறித்து மேலதிகாரியிடம் பேச புதன்கிழமைதான் "பெஸ்ட் சாய்ஸ்" என்று அடித்துக்கூறுகின்றனர் ஆய்வாளர்கள்.வாரத்தின் நடுப்பகுதி என்பதால்,மேலதிகாரிகள் அல்லது முதலாளிகள் டென்ஷன் குறைந்து காணப்படுவார்கள் என்பதால், நமது கோரிக்கைக்கு சாதகமாக பலன் கிடைக்கும் என்கிறது லண்டனில் இது தொடர்பாக மேற்கொள்ளப்பட்ட பல ஆராய்ச்சிகளின் முடிவுகள்.

வியாழக்கிழமை:
செக்ஸ் வைக்கும் தினம்:

செக்ஸ் வைத்துக்கொள்ள சிறந்த தினம் வியாழக்கிழமையைப்போன்று வேறு எதுவும் இல்லை என்கிறார்கள் இது தொடர்பான ஆய்வை மேற்கொண்டவர்கள். வாரத்தின் நடுப்பகுதியை தாண்டிய தினம் என்பதால், அன்றைய தினம் பாலியல் இச்சைக்கான செக்ஸ் ஹார்மோன்களை தூண்டும் "கார்டிஸால் எனர்ஜி" அளவு உச்சத்தில் இருக்குமாம்.எனவே அன்றைய தினம் அதிகாலையில் கலவியலில் ஈடுபடுவது ஆகச்சிறந்தது என்கிறார்கள்.

ஆண்களுக்கான (செக்ஸ் ஹார்மோன்) டெஸ்டோஸ்டெரோனும்,பெண்களுக்கான ஆஸ்ட்ரோஜ்னும் மற்ற நாட்களை விட ஐந்து மடங்கு அதிகமாக இருக்கும் என்பதால், அன்றைய தினம் அதிகாலை அலாரம் வைத்துக்கூட எழுந்துகொள்ளலாம் என்று கூறி நமுட்டு சிரிப்பு ஒன்றை உதிர்க்கிறார்கள் இந்த ஆய்வை மேற்கொண்டவர்கள்.

வெள்ளிக்கிழமை:
புகைப்பதை கைவிட சிறந்த நாள்:

வார இறுதி என்பதாலும்,மறுதினம் வாரவிடுமுறை என்பதாலும் டென்சன், மன அழுத்தம் போன்றவை இருக்காது."வில் பவர்" எனப்படும் மன உறுதியும் அதிகம் இருக்கும் என்பதால் குறைந்தபட்சம் அன்றைய ஒரு தினத்திற்காவது புகைக்காமல் இருக்கலாம்.முடிந்தால் இனிமேல் புகைப்பதில்லை என்று மனதிற்குள் எடுத்துக்கொண்ட சத்தியத்தை அன்றைய தினம் நடைமுறைப்படுத்த தொடங்கலாம் என்கிறார்கள் ஆராய்ச்சியாளர்கள்.

அதே சமயம வெள்ளிக்கிழமை நாம் வார விடுமுறை "மூடு"க்கு வந்துவிடுவோம் என்பதால், சிந்திக்கும் திறன் குறைந்துவிட வாய்ப்புள்ளது.எனவே முக்கிய முடிவுகளை அன்றைய தினம் எடுப்பதை தவிர்க்கலாம் என்றும் அவர்களது அட்வைஸ்!

சனிக்கிழமை:
குழந்தை பெற்றுக்கொள்ள சிறந்த தினம்

உங்களது குழந்தை எதிலும் சிறந்தவராக விளங்கவேண்டும் அல்லது வெற்றியாளராக திகழவேண்டும் என்றால் அந்த குழந்தை சனிக்கிழமையன்று பிறந்தால் நிச்சயம் நடக்கும் என்கிறது "Office for National Statistics" மேற்கொண்ட ஆய்வு. அவ்வளவு ஏன் சனிக்கிழமையன்று பிறந்தவர்கள் பிரதமராக ஆவதற்கு கூட வாய்ப்புள்ளதாம்.ஏனெனில் உலகில் 21 பிரதமர்கள் சனிக்கிழமைகளில் பிறந்தவர்கள்தான் என்றும், இதில் 1900 ஆம் ஆண்டுக்கு பின்னர் 6 பிரதமர்கள் சனிக்கிழமைகளில் பிறந்தவர்கள்தான் என்கிறது இந்த ஆய்வு.

ஞாயிறு:
வெளியில் சாப்பிட சிறந்த தினம்

வீட்டில் மனைவி சமையலை சாப்பிட்டு போரடித்துப்போனவர்கள் அல்லது குடும்பத்தினரோடு ஓட்டலில் சாப்பிட விரும்புபவர்கள் பாரம்பரியமாக கடைபிடிக்கப்பட்டு வரும் இந்த பழக்கத்தை தொடர ஏற்ற தினம்தான் ஞாயிறு என்கிறது ஆராய்ச்சி.

http://tamil.webdunia.com/miscellaneous/health/psychology/1106/30/1110630062_2.htm

ராசா, கனிமொழிக்கு பிணை வழங்க வேண்டும்: ஜஸ்வந்த் சிங்

2ஜி வழக்கில் கைது செய்யப்பட்டுள்ள முன்னாள் அமைச்சர் ஆ. ராசா மற்றும் திமுக எம்.பி., கனிமொழி ஆகியோருக்கு பிணை வழங்கப்பட வேண்டும் என்று பா.ஜனதா மூத்த தலைவரும், முன்னாள் மத்திய அமைச்சருமான ஜஸ்வந்த் சிங் கூறியுள்ளார்.

தனியார் தொலைக்காட்சி ஒன்றுக்கு அளித்துள்ள பேட்டியில் இது தொடர்பாக அவர் கூறியிருப்பதாவது:

யாராவது குற்றச்சாட்டுக்கு உள்ளானால், அது கொலை, திருட்டு போன்ற குற்றமாக இல்லாத நிலையில், விசாரணை நடைபெறும் சூழலில் குற்றம்சாட்டப்பட்டவர்கள் சிறையில் வைக்கப்படத் தேவையில்லை.
ஏனெனில், நிரந்தரமாக அவர்களுக்கு பிணை மறுக்க இயலாது..

பிணைய விடுதலை என்பது குடிமக்களின் உரிமை. ராசாவுக்கும், கனிமொழிக்கும் பிணை வழங்கப்பட வேண்டும்.இது தொடர்பாக பல நீதிமன்ற தீர்ப்புகள் உள்ளன.

அதே சமயம் இது எனது தனிப்பட்ட கருத்துதானே தவிர, பா.ஜனதாவின் கருத்து அல்ல. எனினும், அவர்களை நிரந்தரமாக சிறையில் வைக்க வேண்டும் என்று பா.ஜனதா கூறவில்லை.

இவ்வாறு அந்த பேட்டியில் ஜஸ்வந்த் சிங் கூறியுள்ளார்.

http://tamil.webdunia.com/newsworld/news/national/1107/01/1110701057_1.htm

புலம்பெயர்ந்தோர் பற்றிய தகவல்களைத் திரட்ட புதிய புலனாய்வுப்பிரிவு - கனடாவின் உதவியுடன் உருவாக்குகிறது சிறிலங்கா

புலம்பெயர்வோர் பற்றிய தகவல்களைத் திரட்டுவதற்கான புதிய புலனாய்வுப் பிரிவு ஒன்றையும், தொலைந்து போன கடவுச்சீட்டுகள் பற்றிய புள்ளிவிபரங்களை இணையம் மூலம் கோவைப்படுத்துவதற்கான பிரிவு ஒன்றையும் உருவாக்குவதற்கு சிறிலங்கா அரசாங்கம் திட்டமிட்டுள்ளது.

நாட்டின் பாதுகாப்பை பலப்படுத்தி, மீளவும் தீவிரவாதம் தலைதூக்குவதைத் தடுக்கும் நோக்கிலேயே இந்தத் திட்டங்களை சிறிலங்கா அரசாங்கம் நடைமுறைப்படுத்தவுள்ளது.

சிறிலங்கா பாதுகாப்பு அமைச்சின் நேரடிக் கண்காணிப்பின் கீழ் இந்த இரு பிரிவுகளும் இந்த ஆண்டு இறுதியில் உருவாக்கப்படவுள்ளன.

அனைத்துலக காவல்துறையிடம் இருந்து புலம்பெயர்ந்து செல்லும் சிறிலங்காவைச் சேர்ந்தவர்கள் பற்றிய தகவல்கள் பெறப்பட்டு இணையத்தளத்தில் சேர்த்துக் கொள்ளப்படவுள்ளது.

இதன் மூலம் உலகெங்கிலும் புலம்பெயர்ந்து வாழும் 20மில்லியனுக்கும் அதிகமானோர் பற்றிய இரகசிய அறிக்கைகளையும், தொலைந்து போன கடவுச்சீட்டுகள் பற்றிய விபரங்களையும் சிறிலங்கா அரசினால் பெற்றுக் கொள்ள முடியும்.

இதன் மூலம் தீவிரவாதிகள் அல்லது பாரிய குற்றச்செயல்களில் ஈடுபட்ட பின்னர் நாட்டை விட்டு வெளியேறுபவர்கள் மற்றும் நாட்டுக்குள் வருபவர்களையும் இணங்காணக் கூடியதாக இருக்கும் என்று தெரிவிக்கப்படுகிறது.

இந்தத் திட்டத்தை நடைமுறைப்படுத்த சிறிலங்கா அரசுக்கு கனடா உதவி வழங்கவுள்ளது.

http://www.puthinappalakai.org/view.php?20110701104181

சிறிலங்காவை ஐ.நா மனிதஉரிமைகள் பேரவை சும்மா விட்டு விடாது - நவி பிள்ளை மீண்டும் எச்சரிக்கை

போர்க்குற்றச்சாட்டுகளை விசாரிக்க சிறிலங்கா அரசாங்கம் அதிக காலம் எடுத்துக் கொள்ளக் கூடாது என்று கூறியுள்ள ஐ.நா மனித உரிமைகள் ஆணையாளர் நவிபிள்ளை, நம்பகமான விசாரணையை முன்னெடுக்கத் தவறினால் அனைத்துலக நடவடிக்கைக்கு வழிவகுக்கும் என்றும் எச்சரித்துள்ளார்.

குற்றச்சாட்டுகள் தொடர்பாக சிறிலங்கா தீவிரமாக விசாரிக்க வேண்டும் என்று ஐ.நா மனிதஉரிமைகள் பேரவையின் உறுப்பு நாடுகள் மத்தியில் வலுவான எதிர்பார்ப்பு இருப்பதாகவும் அவர் மேலும் கூறியுள்ளார்.

சிறிலங்காவில் முன்னர் நடத்தப்பட்ட உள்ளக விசாரணைகள் முழுமை பெறாமல் தோல்வியடைந்ததாகவும் அவர் சுட்டிக்காட்டியுள்ளார்.

அத்தகைய விசாரணை அறிக்கைகள் பகிரங்கமாக வெளியிடப்படவில்லை என்றும், ஒருவருக்கேனும் தண்டனையை கொடுக்கப்படவில்லை என்றும் ஐ.நா மனிதஉரிமைகள் ஆணையாளர் குற்றம்சாட்டியுள்ளார்.

அதுபோன்றே மீண்டும் நடந்தால், அனைத்துலக சமூகத்தின் தலையீட்டின் மூலம் மேலதிக நடவடிக்கை எடுக்கப்படும் என்று எச்சரித்துள்ள நவி பிள்ளை, ஐ.நா மனிதஉரிமைகள் பேரவை இந்த விவகாரத்தில் தீவிரமாகச் செயற்படும் என்று தான் உறுதியாக நம்புவதாகவும் கூறியுள்ளார்.

போர்க்குற்றங்கள் தொடர்பாக சிறிலங்கா விரைவான விசாரணைகளை நடத்த வேண்டும் என்று கடந்த செவ்வாயன்று அமெரிக்கா
வலியுறுத்தியிருந்த நிலையிலேயே, ஐ.நா மனிதஉரிமைகள் ஆணையாளரின் இந்த எச்சரிக்கை வெளிவந்துள்ளது.

http://www.puthinappalakai.org/view.php?20110701104180

உறவுக்கு கை கொடுப்போம்; உரிமைக்கு குரல் கொடுப்போம்: கருணாநிதி அறிவிப்பு

சென்னை: "உறவுக்கு கை கொடுப்போம், உரிமைக்கு குரல் கொடுப்போம்' என, தி.மு.க., தலைவர் கருணாநிதி தெரிவித்துள்ளார்.

அவர் வெளியிட்ட கேள்வி-பதில் அறிக்கை:
* தி.மு.க., ஆட்சியில் நிர்வாகத் திறமையின்மை காரணமாக, தமிழகத்தின் கடன் சுமை ஒரு லட்சம் கோடி ரூபாய்க்கு மேல், அதிகரித்து விட்டதாக முதல்வர் ஜெயலலிதா குற்றம் சாட்டியுள்ளாரே?
இக்குற்றச்சாட்டை எதிர்கட்சித் தலைவராக இருந்த போதிலிருந்தே கூறி வருகிறார். தி.மு.க., 2006ம் ஆண்டு ஆட்சிக்கு வருவதற்கு முன்பாக, தமிழக அரசின் மொத்தக் கடன் 57 ஆயிரத்து 457 கோடி ரூபாய். அதுதான் தற்போது ஒரு லட்சம் கோடி ரூபாயாக உயர்ந்துள்ளது. ஜெயலலிதா ஆட்சியிலிருந்த போது, மாநிலத்தின் மொத்த உற்பத்தியில், 22.29 சதவீதம் கடன் சுமை வைத்திருந்தார். தி.மு.க., ஆட்சியில், 19.58 சதவீதம்தான் கடன் இருந்தது. இது போன்ற நிதிப் பிரச்னைகளில் குற்றம் சாட்டும்போது, நிதித்துறை செயலர் போன்ற அதிகாரிகளை கலந்து, உண்மையான புள்ளி விவரங்களை அறிந்து குற்றம் சாட்டுவது, முதல்வர் பதவிக்கு அழகாகும்.

* தி.மு.க., ஆட்சியில் காவல்துறை ஏவல் துறையாக இருந்ததால், சட்டம் ஒழுங்கு கெட்டு விட்டது. அ.தி.மு.க., ஆட்சியில் காவல் துறையினருக்கு பாதுகாப்பு தரப்படும், என ஜெயலலிதா செய்த அறிவிப்பு குறித்து?

ஜெயலலிதா டில்லி சென்றபோது, அவரது கட்சியினர் இரவு கொடி கட்டிவிட்டு, ஓட்டலில் சாப்பிட்டுள்ளனர். நள்ளிரவு என்பதால், அவ்வழியே வந்த போலீஸ் துணை கமிஷனர், ஓட்டலை மூடும்படி கூறியுள்ளார். அ.தி.மு.க.,வினர் அவரை மிரட்டியுள்ளனர். அவர் மிரட்டியவர்களை போலீஸ் நிலையம் கொண்டு சென்றுள் ளார். ஆளும் கட்சி எம்.எல்.ஏ., அமைச்சர் ஆகியோர் போலீஸ் நிலையம் சென்று, அவர்களை அழைத்து சென்றுள்ளனர். அந்த அதிகாரி பட்டாலியனுக்கு மாற்றப்பட்டார். அ.தி.மு.க., தோழமை கட்சியான தே.மு.தி.க., - எம்.எல்.ஏ., ஓமலூர் போலீஸ் நிலையம் சென்று மிரட்டியுள்ளார். இவை ஒரு மாத கால ஆட்சியின் சாதனைகள். இது தான் அ.தி.மு.க., அரசு, காவல் துறைக்கு தரும் பாதுகாப்பின் லட்சணம் என மக்கள் பேசத் துவங்கி உள்ளனர்.

* ஜெயலலிதா மீதான சொத்துக் குவிப்பு வழக்கு இழுத்துக் கொண்டே போகிறதே?

தாமதிக்கப்பட்ட நீதி... மறுக்கப்பட்ட நீதி.

* "லோக்பால் மசோதாவில் பிரதமரை சேர்க்கக் கூடாது' என்று ஜெயலலிதா கூறியுள்ளாரே?

நான் பிரதமரை, அந்த வரம்பிற்குள் சேர்க்க வேண்டும் என்று சொன்னது, நாம் அதற்காக பயப்படவில்லை, தெளிவாக இருக்கிறோம், என்று உலகத்தின் முன்பு தெளிவாக்க பயன்படும் என்பதால்தான். எனது கருத்து எந்த அடிப்படையில் சொல்லப்பட்டதோ, அதே அடிப்படையில் நேற்று பிரதமரே, லோக்பால் மசோதாவில் பிரதமரை சேர்ப்பதில், ஆட்சேபனை இல்லை என தெரிவித்துள்ளார். "உறவுக்கு கை கொடுப்போம், உரிமைக்கு குரல் கொடுப்போம்' என்ற தி.மு.க.,வின் நீண்ட நாள் முழக்கத்தை நினைவு படுத்துகிறேன். இவ்வாறு கருணாநிதி தெரிவித்துள்ளார்.

http://www.dinamalar.com/News_Detail.asp?Id=267251

சாதிக் பாட்சா மரணம் தற்கொலையல்ல, கொலை -சிபிஐ

சென்னை & டெல்லி: 2ஜி விவகாரத்தில் முக்கிய குற்றவாளிகளில் ஒருவராகவும் சாட்சியாகவும் இருந்த முன்னாள் தொலைத் தொடர்புத்துறை அமைச்சர் ராசாவின் நண்பரான சாதி்க் பாட்சா கொலை செய்யப்பட்டிருக்கலாம் என்று சிபிஐ சந்தேகி்க்கிறது.

இதையடுத்து சாதிக் பாட்சாவின் (37) மரண அறிக்கையை மீண்டும் ஆய்வு செய்யுமாறு அகில இந்திய மருத்துவக் கவுன்சிலுக்கு (AIIMS) கோரிக்கை விடுக்க சிபிஐ முடிவு செய்துள்ளது.

ராசாவின் சொந்த ஊரான பெரம்பலூரைச் சேர்ந்த சாதிக் பாட்சா, ரியல் எஸ்டேட் தொழிலில் ஈடுபட்டு வந்தார். 2ஜி வழக்கில் இவர் ஒரு முக்கியப் புள்ளியாக கருதப்பட்டார். இவரிடம் சிபிஐ அதிரடி விசாரணை நடத்தியிருந்தது. இவரது தொழில் அலுவலகங்களில் ரெய்டுகளும் நடத்தப்பட்டிருந்தன.

இந் நிலையில், சென்னை தேனாம்பேட்டையில் உள்ள தனது வீட்டில் கடந்த மார்ச் 16ம் தேதி தூக்கில் தொங்கிய நிலையில் பிணமாக கண்டெடுக்கப்பட்டார் பாட்ஷா. சிபிஐ விசாரணையால் மன உளைச்சலில் தவித்து வந்த அவர் தற்கொலை செய்து கொண்டதாக அவரது மனைவி மற்றும் உறவினர்கள் கூறினர்.

ஆனால் சம்பவம் நடந்து பல மணி நேரத்திற்குப் பிறகுதான் பாட்ஷாவின் மரணம் குறித்த தகவல் வெளியானதால் அதுகுறித்து பல்வேறு சந்தேகங்கள் எழுந்தன. அப்போது திமுக ஆட்சியில் இருந்தது.

பாட்ஷா மரணம் குறித்து பல்வேறு கேள்விகள் எழுந்ததால் வழக்கை சிபிஐ வசம் ஒப்படைத்தது திமுக அரசு. இந் நிலையில் பாட்சா கொலை செய்யப்பட்டிருக்கலாம் என்று சிபிஐ கருதுகிறது.

வீட்டில் சாதிக் பாட்சாவின் உடல் இருந்த நிலையைப் பார்த்தால், அது தற்கொலை போலத் தெரியவில்லை என்றும், அவரது உடலை பிரதேசப் பரிசோதனை செய்த அரசு டாக்டர் டெக்கால், இது மூச்சுத் திணறடிக்கப்பட்டு (asphyxia) ஏற்பட்ட மரணம் என்று குறிப்பிட்டுள்ளார். மேலும் பாட்சாவின் கழுத்து நெரிக்கப்பட்டதற்கான அடையாளங்கள் இருப்பதாகவும் மருத்துவர் கூறியுள்ளார். எனவே, சிபிஐக்கு இந்த மரணத்தில் சந்தேகம் ஏற்பட்டுள்ளது.

பாட்சாவின் குடல் பாகங்கள் குறித்த மருத்துவ ஆய்வறிக்கைக்காக சிபிஐ காத்துக் கொண்டுள்ளது.

இதுகுறித்து பெயர் குறிப்பிட விரும்பாத சிபிஐ அதிகாரி ஒருவர் கூறுகையில் பாட்ஷா தற்கொலை செய்து கொண்டது போன்ற சூழல் காணப்பட்டாலும், அவர் கொலை செய்யப்பட்டிருப்பதற்கான முகாந்திரங்கள் தற்போது கிடைத்துள்ளன. எனவே உள்ளூர் போலீஸார் கூறியது போல இது தற்கொலை அல்ல, கொலை என்ற முடிவுக்கு வந்துள்ளோம். குற்றம் நடந்த இடம், அதற்கான சூழல், கிடைத்துள்ள சாட்சியங்களின் அடிப்படையில் இந்த முடிவுக்கு வந்துள்ளோம். இருப்பினும் இதை உறுதிப்படுத்திக் கொள்ள தொடர்ந்து விசாரணை நடந்து வருகிறது என்றார்.

ஒரு டாக்டர்கள் குழுவை அமைத்து சாதிக் பாட்சாவின் பிரேதப் பரிசோதனை அறிக்கையை மீண்டும் ஆய்வு செய்யுமாறு அகில இந்திய மருத்துவக் கவுன்சிலிடம் கோர சிபிஐ முடிவு செய்துள்ளது.
http://thatstamil.oneindia.in/news/2011/07/01/cbi-fears-raja-aide-sadiq-batcha-was-murdered-aid0091.html